អ៊ុយក្រែន​ ទទួលដំណឹងអាក្រក់ពី សហរដ្ឋអាមេរិក

នេះជាដំណឹងអាក្រក់មួយសម្រាប់អ៊ុយក្រែន ដែលមន្ទីរបញ្ចកោណ នឹងអាចជួយដល់ប្រតិបត្តិការរបស់ទីក្រុងកៀវ បានត្រឹមពីរទៅបីសប្តាហ៍ទៀតប៉ុណ្ណោះ ប្រសិនបើសភាមិនយល់ព្រមអនុម័តច្បាប់ផ្តល់មូលនិធិថ្មីទេនោះ។ នេះបើតាមការអះអាងពី អ្នកនាំពាក្យក្រុមប្រឹក្សាសន្តិសុខជាតិសេតវិមានលោក John Kirby។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសជាមួយ CNN ដែលចេញផ្សាយកាលពីថ្ងៃចន្ទទី២៥ខែកញ្ញា លោក Kirby ត្រូវបានសួរថាតើ ការបិទរដ្ឋាភិបាល អាចមានផលប៉ះពាល់អ្វីខ្លះ លើជំនួយរបស់សហរដ្ឋអាមេរិកដល់ទីក្រុងកៀវ។

មន្ត្រីសេតវិមានរូបនេះនិយាយថា “យើង​មាន​ថវិកា​បន្ថែម​បន្តិច​បន្តួច​ដើម្បី​ផ្តល់ឲ្យ ដូច្នេះ​ខ្ញុំ​គិត​ថា ​យើង​នឹង​មិន​អី​ទេ​សម្រាប់​ប៉ុន្មាន​សប្តាហ៍​ខាង​មុខ ប៉ុន្តែបើគ្មានការអនុម័តសំណើបន្ថែមតាមការស្នើសុំទេនោះ វានឹងជះឥទ្ធិពលលើសមត្ថភាពរបស់យើង ក្នុងការជួយអ៊ុយក្រែនឲ្យបានល្អក្នុងរដូវស្លឹកឈើជ្រុះ និងក្នុងរដូវរងា។ ប្រសិនបើមានការបិទរដ្ឋាភិបាល នោះនឹងមានផលប៉ះពាល់យ៉ាងខ្លាំងដល់សមត្ថភាពរបស់ពួកគេ ក្នុងការទទួលបានជោគជ័យនៅលើសមរភូមិ”។

រដ្ឋាភិបាលទីក្រុងវ៉ាស៊ីនតោន បានអនុម័តថវិការាប់ពាន់លានដុល្លារ ជាជំនួយផ្នែកយោធាដោយផ្ទាល់ដល់ទីក្រុងកៀវ ចាប់តាំងពីការប្រយុទ្ធជាមួយរុស្ស៊ី ផ្ទុះឡើងក្នុងខែកុម្ភៈឆ្នាំ២០២២ ក្នុងនោះរួមមានទាំងការដឹកជញ្ជូនសព្វាវុធធុនធ្ងន់ យានយន្ត និងគ្រាប់បែកជាច្រើនផងដែរ។

ជំនួយចុងក្រោយបំផុត គឺជារថក្រោះប្រយុទ្ធដ៏សំខាន់របស់អាមេរិកឈ្មោះ Abrams។

ទីក្រុងមូស្គូ បានថ្កោលទោសម្តងហើយម្តងទៀត ចំពោះការដឹកជញ្ជូនអាវុធបរទេសទៅឲ្យអ៊ុយក្រែន ដោយលើកហេតុផលថា ការធ្វើបែបនេះ គ្រាន់តែអូសបន្លាយជម្លោះប៉ុណ្ណោះ។

ដោយអត្ថាធិប្បាយលើការបញ្ជូនរថក្រោះ Abrams កាលពីដើមឆ្នាំនេះ អ្នកនាំពាក្យវិមានក្រឹមឡាំង លោក Dmitry Peskov និយាយថា បណ្តាប្រទេសលោកខាងលិច កំពុងវាយតម្លៃខុសអំពីឥទ្ធិពលរបស់រថក្រោះធុន ហើយអាវុធអាមេរិកទាំងអស់ នឹងត្រូវឆេះខ្ទេច៕

ប្រែសម្រួល៖ Vann Vann

ប្រភព៖ RT

ចុចអាន៖ លោក បៃដិន ព្រមានថា ប្រជាជនអាមេរិករាប់លាននាក់នឹងត្រូវរងទុក្ខ អ្នកខ្លះអាចអត់ឃ្លាន បើរដ្ឋាភិបាលសហព័ន្ធ ត្រូវបិទមែន