ផ្ទុះដេប៉ូសាំងនៅ Nagorno-Karabakh ស្លាប់និងរបួសមនុស្សជាង ៣០០នាក់ ខណៈរាប់ម៉ឺននាក់​ ត្រូវជម្លៀស

អាជ្ញាធរអាមេនីនិយាយថា ការផ្ទុះនៅដេប៉ូសាំងមួយកន្លែងក្នុងតំបន់ Nagorno-Karabakh ប្រទេសអាស៊ែបៃហ្សង់ បានសម្លាប់មនុស្សចំនួន២០នាក់ និងរាប់រយនាក់ទៀតរងរបួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះដែរ មនុស្សជិត៣០០នាក់ ត្រូវបានបញ្ជូនទៅមន្ទីរពេទ្យ ហើយក្នុងនោះ មានរាប់នាក់ស្ថិតក្នុងស្ថានភាពធ្ងន់ធ្ងរ។

ហេតុការណ៍នេះ កើតឡើងចំពេលរដ្ឋាភិបាលអាមេនី និយាយថា ជនភៀសខ្លួន១៣៣៥០នាក់ បានចេញពីតំបន់ ឆ្លងចូលទៅក្នុងប្រទេសនេះ។

ទោះបីជាយ៉ាងណាក៏ដោយ គេ​នៅ​មិន​ទាន់​ដឹង​ច្បាស់ទេ ​ពី​អ្វី​ដែល​បណ្តាល​ឲ្យ​មាន​ការ​ផ្ទុះ ​ក្នុង​ទីក្រុង​សំខាន់​ Stepanakert។

ក្នុងសេចក្តីថ្លែងការណ៍មួយនៅថ្ងៃអង្គារ មន្ត្រីក្នុងតំបន់និយាយថា សាកសពមិនស្គាល់អត្តសញ្ញាណចំនួន១៣នាក់ ត្រូវបានរកឃើញនៅកន្លែងកើតហេតុ និង៧នាក់ទៀតស្លាប់ក្នុងមន្ទីរពេទ្យ។

ចាប់តាំងពីអាស៊ែបៃហ្សង់ ដណ្តើមកាន់កាប់តំបន់ Nagorno-Karabakh កាលពីសប្តាហ៍មុនមក មនុស្សរាប់ពាន់នាក់បានចាកចេញ បន្ទាប់ពីរដ្ឋាភិបាលអាមេនីក្នុងទីក្រុង យ៉េរ៉េវ៉ាន់ បានប្រកាសពីផែនការជម្លៀសអ្នកដែលគ្មានផ្ទះសម្បែងដោយការប្រយុទ្ធគ្នា។

គួរបញ្ជាក់ថា តំបន់ Nagorno-Karabakh នៅ Caucasus ភាគខាងត្បូង ត្រូវបានទទួលស្គាល់ជាអន្តរជាតិថាជាផ្នែកមួយនៃប្រទេសអាស៊ែបៃហ្សង់ ប៉ុន្តែអាមេនី បានដាក់ការគ្រប់គ្រងអស់រយៈពេល៣ទសវត្សរ៍មកហើយ៕

ប្រែសម្រួល៖ Vann Vann

ប្រភព៖ BBC

ចុចអាន៖ អាមេនី ស្នើ ឲ្យ អាមេរិក ធ្វើ អន្តរាគមន៍ ក្នុង ជម្លោះ នៅ Karabakh