អ្នកស៊ើបការណ៍រុស្ស៊ី ៥ នាក់ បង្ហាញខ្លួននៅតុលាការទីក្រុងឡុងដ៏

មនុស្សចំនួន ៥នាក់ ត្រូវបានចោទប្រកាន់ថា ជាផ្នែកនៃក្រុមចារកម្មរុស្ស៊ីដែលកំពុងប្រតិបត្តិការនៅក្នុងចក្រភពអង់គ្លេស បានបង្ហាញខ្លួននៅក្នុងតុលាការទីក្រុងឡុងដ៏ កាលពីព្រឹកថ្ងៃទី២៦ ខែកញ្ញា ឆ្នាំ២០២៣។

មនុស្សប្រុសស្រីជនជាតិប៊ុលហ្គារីចំនួន ៥ នាក់ រួមមាន Orlin Roussev, Bizer Dzhambazov, Katrin Ivanova, Ivan Stoyanov និង Vanya Gaberova ត្រូវបានចោទប្រកាន់ថា បានសមគំនិតក្នុងការប្រមូលព័ត៌មានដែលនឹងមានប្រយោជន៍ដល់រុស្ស៊ី។ តាមប្រភពពី BBC ​ពួកគេ​បាន​ធ្វើ​ការ​ឃ្លាំ​មើល​មនុស្ស ​និង​ទីកន្លែង​ដែល​រុស្ស៊ី​កំណត់​ នៅ​ចន្លោះ​ខែ​សីហា​ ឆ្នាំ​២០២០ ដល់​ខែ​កុម្ភៈ​ ឆ្នាំ២០២៣។

បច្ចុប្បន្នជនសង្ស័យត្រូវបានឃុំខ្លួនបណ្តោះអាសន្ននៅពន្ធនាគារចំនួន ៤ ផ្សេងគ្នា ខណៈការបង្ហាញខ្លួនបំភ្លឺរបស់ពួកគេត្រូវបានធ្វើឡើងតាមរយៈតំណភ្ជាប់វីដេអូ។ នៅពេលសួរចម្លើយ ជនជាប់ចោទទាំង ៥ នាក់ មិនព្រមនិយាយអ្វីនោះទេ ក្រៅប្រាប់ឈ្មោះ និងថ្ងៃខែឆ្នាំកំណើត។

តាមពិតប៉ូលិសប្រឆាំងភេរវកម្មចាប់ខ្លួនពួកគេបានតាំងពីខែកុម្ភៈមកម្ល៉េះ ពួកគេទាំងនោះ​គឺ៖

១. Orlin Roussev អាយុ ៤៥ឆ្នាំ

២. Bizer Dzhambazov អាយុ ៤១ឆ្នាំ

៣. Katrin Ivanova អាយុ ៣១ឆ្នាំ

៤. Ivan Stoyanov អាយុ ៣១ឆ្នាំ

៥. Vanya Gaberova អាយុ ២៩ឆ្នាំ

ថ្លែងនៅតុលាការ Westminster Magistrates កាលពីថ្ងៃអង្គារ អនុប្រធានចៅក្រម Tan Ikram បាននិយាយថា អ្នកទាំង ៥ នឹងបង្ហាញខ្លួនម្ដងទៀតនៅ Old Bailey នាថ្ងៃទី១៣ ខែតុលា ខាងមុខ៕

ប្រែសម្រួល៖ សន្យា

ប្រភព៖ BBC

ចុចអាន៖ ផ្ទុះដេប៉ូសាំងនៅ Nagorno-Karabakh ស្លាប់និងរបួសមនុស្សជាង ៣០០នាក់ ខណៈរាប់ម៉ឺននាក់​ ត្រូវជម្លៀស