ចិន ចេញការព្រមានទៅ ហ្វីលីពីន រឿងកាត់ “របាំងបណ្ដែតទឹក” ក្នុងតំបន់​មានជម្លោះនៅសមុទ្រចិនខាងត្បូង

អ្នកនាំពាក្យក្រសួងការបរទេសចិន លោក Wang Wenbin បាននិយាយកាលពីថ្ងៃអង្គារថា ប្រទេសចិនបានផ្តល់ដំបូន្មានដល់ប្រទេសហ្វីលីពីនឲ្យបញ្ចៀសការបង្កហេតុណាមួយក្នុងតំបន់មានជម្លោះនៅសមុទ្រចិនខាងត្បូង បន្ទាប់ពីការកាត់ផ្ដាច់របាំងបណ្ដែតទឹក ។

លោក Wang បានប្រាប់សន្និសីទសារព័ត៌មានមួយថា “ប្រទេសចិនគាំទ្រយ៉ាងខ្លាំងចំពោះអធិបតេយ្យភាព សិទ្ធិដែនសមុទ្រ និងផលប្រយោជន៍នៃកោះ Huangyan ឬតំបន់ថ្មប៉ប្រះទឹក Scarborough ហើយយើងសូមណែនាំហ្វីលីពីនឲ្យចៀសវាងការបង្កហេតុណាមួយកើតឡើង” ។

ការព្រមាននេះកើតមានឡើង បន្ទាប់ពីឆ្មាំឆ្នេរសមុទ្រហ្វីលីពីនបានបើកប្រតិបត្តិការពិសេសមួយកាត់របាំងបណ្តែតទឹកប្រវែង ៣០០ ម៉ែត្រចេញដោយជោគជ័យ បន្ទាប់ពីត្រូវបានដំឡើងដោយប្រទេសចិន នៅជិតតំបន់ថ្មប៉ះប្រះទឹកដែលមានជម្លោះ Scarborough ក្នុងសមុទ្រចិនខាងត្បូង ។

ដែនទឹកជុំវិញតំបន់ថ្មប៉ប្រះទឹកនេះត្រូវបានគេស្គាល់ថាជាច្រកនេសាទដ៏សម្បូរបែប ហើយមានទីតាំងនៅក្នុងតំបន់សេដ្ឋកិច្ចផ្តាច់មុខរបស់ប្រទេសហ្វីលីពីន ប៉ុន្តែតំបន់ទាំងនេះស្ថិតនៅក្រោមការគ្រប់គ្រងពេញលេញរបស់ប្រទេសចិន ចាប់តាំងពីឆ្នាំ ២០១២ មកម្ល៉េះ ។

ទោះយ៉ាងណា យោងតាមសេចក្តីសម្រេចឆ្នាំ ២០១៦ ដោយតុលាការអាជ្ញាកណ្តាលអន្តរជាតិបានទទួលស្គាល់ថាប្រទេសចិនបានរំលោភលើសិទ្ធិនេសាទរបស់ប្រជានេសាទហ្វីលីពីន ។ ប៉ុន្តែក្រសួងការបរទេសចិនបានឆ្លើយតបវិញថា តំបន់ទាំងនេះគឺជា “ទឹកដីរបស់ប្រទេសចិន” ជាពិសេសរដ្ឋាភិបាលទីក្រុងប៉េកាំងមាន “អធិបតេយ្យភាពដែលមិនអាចប្រកែកបាន” លើតំបន់ទាំងនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ឆ្មាំឆ្នេរ ហ្វីលីពីន កាត់ “របាំងបណ្ដែតទឹក” ប្រវែង ៣០០ ម៉ែត្រនៅសមុទ្រចិន​ខាងត្បូង ចេញដោយជោគជ័យ