តៃវ៉ាន់ បង្ហាញនាវាមុជទឹក ផលិតក្នុងស្រុកដំបូងតម្លៃ ១.៥៤ពាន់លានដុល្លារ ដើម្បីកម្លា ចិន

កោះតៃវ៉ាន់ បានបង្ហាញនាវាមុជទឹកផលិតក្នុងស្រុកដំបូងរបស់ខ្លួន ខណៈទីក្រុងតៃប៉ិ កំពុងពង្រឹងផ្នែកការពារ ប្រឆាំងនឹងការវាយប្រហាររបស់ចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រីប្រធានាធិបតី Tsai Ing-wen បានធ្វើជាអធិបតីក្នុងពិធីសម្ពោធនាវាមុជទឹកឈ្មោះ Haikun នេះ នៅទីក្រុងកំពង់ផែ Kaohsiung នាថ្ងៃព្រហស្បតិ៍ទី២៨ខែកញ្ញា។

ឈរនៅពីមុខនាវាមុជទឹក ដែលដណ្តប់ទង់ជាតិតៃវ៉ាន់ លោកស្រី Tsai និយាយថា “ប្រវត្តិសាស្ត្រ នឹងចងចាំជារៀងរហូតនៅថ្ងៃនេះ។ ពីមុន គំនិត​នៃការផលិត​នាវា​មុជ​ទឹក​ក្នុង​ស្រុក ​ត្រូវ​បាន​គេ​ចាត់​ទុក​ថា ជា​កិច្ចការ​មិន​អាច​ទៅ​រួច ប៉ុន្តែ​ពេលនេះយើង​ធ្វើ​វាបាន”។

យោងតាមមន្ត្រីយោធា, នាវាមុជទឹកដើរដោយថាមពលប្រេងម៉ាស៊ូតតម្លៃ ១.៥៤ពាន់លានដុល្លារមួយគ្រឿងនេះ នឹងត្រូវឆ្លងកាត់ការសាកល្បងជាច្រើនលើក ហើយនឹងត្រូវបញ្ជូនទៅឲ្យកងទ័ពជើងទឹក នៅចុងឆ្នាំ២០២៤។

ប្រធានកម្មវិធីនាវាមុជទឹកក្នុងស្រុក ឧត្តមនាវីឯក Huang Shu-kuang បានប្រាប់អ្នកយកព័ត៌មានកាលពីសប្តាហ៍មុនថា គោលដៅនៃការផលិតនាវាបែបនេះ គឺដើម្បីការពារការប៉ុនប៉ងឡោមព័ទ្ធកោះតៃវ៉ាន់ ពីសំណាក់ប្រទេសចិន។ លោកបន្ថែមថា វាក៏នឹងជួយកម្លាចិន ហើយអូសបន្លាយពេល រហូតដល់កងកម្លាំងអាមេរិក និងជប៉ុនមកដល់ ជួយការពារតៃវ៉ាន់ផងដែរ។

ការសាងសង់នាវាមុជទឹកផ្ទាល់ខ្លួនរបស់តៃវ៉ាន់ គឺជាអាទិភាពដ៏សំខាន់យូរមកហើយ សម្រាប់មេដឹកនាំទីក្រុងតៃប៉ិ ប៉ុន្តែកម្មវិធីនេះ ត្រូវបានពន្លឿនក្រោមការដឹកនាំរបស់លោកស្រី Tsai ដែលបានបង្កើនការចំណាយលើផ្នែកយោធាដល់ជិតទ្វេដង ក្នុងអំឡុងពេលកាន់តំណែង។

ទោះបីជាយ៉ាងណាក៏ដោយ ចិន​មិន​ទាន់ចេញការ​ឆ្លើយ​តប​ជា​ផ្លូវ​ការណាមួយ​នៅ​ឡើយ​ទេ។ ប៉ុន្តែនៅក្នុងអត្ថបទមួយ ដែលចេញផ្សាយកាលពីដើមសប្តាហ៍នេះ, ប្រព័ន្ធផ្សព្វផ្សាយរដ្ឋ Global Times បានរាយការណ៍ថា តៃវ៉ាន់កំពុងសុបិន្តទាំងថ្ងៃ ហើយផែនការនេះ គ្រាន់តែជាការបំភាន់ភ្នែកប៉ុណ្ណោះ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ នាវាមុជទឹក នាំអ្នកទេសចរទៅមើលខ្មោចកប៉ាល់ Titanic កំពុងបាត់ខ្លួន ខណៈអុកស៊ីសែន នៅសល់ត្រឹម៦០ម៉ោង