ចិន​ ដំណើរការ​ខ្សែ​រថភ្លើង​ឆ្លង​សមុទ្រ​ដំបូង​គេ​នៅ​ជិត​ច្រក​សមុទ្រ​តៃវ៉ាន់

ប្រទេសចិនបានចាប់ផ្តើមខ្សែរថភ្លើងល្បឿនលឿនដំបូងរបស់ខ្លួនដែលនឹងធ្វើដំណើរឆ្លងកាត់ឆ្នេរនៃមហាសមុទ្រក្នុងខេត្ត Fujian ភាគអាគ្នេយ៍ក្បែរច្រកសមុទ្រតៃវ៉ាន់ ។

សារព័ត៌មានស៊ីនហួរបានរាយការណ៍ថា រថភ្លើងល្បឿនលឿន​នេះធ្វើដំណើរចាកចេញពីទីក្រុង Fuzhou នៃខេត្ត Fujian ភាគខាងកើតប្រទេសចិននៅព្រឹកថ្ងៃព្រហស្បតិ៍នេះ ហើយក៏នឹងរៀបចំការបើកដំណើរការលើផ្លូវដែក Fuzhou ទៅ Xiamen និងទៅ Zhangzhou ដែលមានប្រវែង ២៧៧ គីឡូម៉ែត្រ ។

តាមរយៈក្រុមហ៊ុន China State Railway Group ដែលជាប្រតិបត្តិករផ្លូវដែករបស់ចិនបញ្ជាក់ថា វាជាផ្លូវដែកឆ្លងកាត់សមុទ្រដំបូងគេបង្អស់របស់ប្រទេសចិនដែលមានរថភ្លើងល្បឿនលឿននឹងធ្វើដំណើរលើស្ពានឆ្លងកាត់ឈូងសមុទ្រចំនួន ៣ និងមានល្បឿនអតិបរមា ៣៥០ គីឡូម៉ែត្រក្នុងមួយម៉ោង ។

ខ្សែរថភ្លើងនេះ ចំណាយពេលវេលាតិចជាង ១ ម៉ោងក្នងការធ្វើដំណើររវាងទីក្រុង Fuzhou និង Xiamen ដែលជាមជ្ឈមណ្ឌលសេដ្ឋកិច្ច និងជាតំបន់ទេសចរណ៍ដ៏ពេញនិយមរបស់ចិន ។

នៅឆ្នាំ ២០២២ ចិនមានផ្លូវរថភ្លើងល្បឿនលឿនដែលដំណើរការបាន ៤២,០០០ គីឡូម៉ែត្រ ហើយគិតត្រឹមខែមិថុនា ឆ្នាំ ២០២២ ប្រវែងផ្លូវដែកល្បឿនលឿនដែលដំណើរការជាប្រចាំក្នុងល្បឿន ៣៥០ គីឡូម៉ែត្រក្នុងមួយម៉ោង គឺមានប្រវែងជិត ៣,២០០ គីឡូម៉ែត្រ ។

ដោយឡែកកាលពីដើមសប្តាហ៍នេះ ប្រទេសចិនក៏បានដំណើរការខ្សែរថភ្លើងពាណិជ្ជកម្មដំបូងរបស់ខ្លួនឡើងវិញផងដែរ បន្ទាប់ពីផ្អាកអស់មួយរយៈនៅក្នុងទីក្រុង Wuhan នៃខេត្ត Hubei ៕​

ប្រែសម្រួល៖ នាង រតនៈ

ប្រភព៖​ CNA