លោក សេដ្ឋា រីករាយ ចំពោះការស្វាគមន៍យ៉ាងកក់ក្តៅរបស់កម្ពុជា ហើយអញ្ជើញសម្តេចធិបតី ហ៊ុន ម៉ាណែត ធ្វើទស្សនកិច្ចប្រទេស ថៃ វិញ

បន្ទាប់ពីដំណើរទស្សនកិច្ចរយៈពេលមួយថ្ងៃនៅព្រះរាជាណាចក្រកម្ពុជា លោក សេដ្ឋា ថាវីស៊ីន នាយករដ្ឋមន្ត្រីថៃ បានបង្ហោះនៅលើ Facebook និង X (អតីត Twitter) ថា លោកមានអារម្មណ៍រីករាយនិងកិត្តិយស ក្នុងដំណើរទស្សនកិច្ចនេះ ហើយបន្ថែមថា លោកទទួលបានការស្វាគមន៍យ៉ាងកក់ក្តៅពីមេដឹកនាំកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងដំណើរទស្សនកិច្ចនេះដែរ អ្នកនាំពាក្យរដ្ឋាភិបាលថៃ លោក Chai Wacharonke និយាយថា ប្រទេសថៃនិងកម្ពុជា នឹងធ្វើការរួមគ្នា ដើម្បីបង្កើនទំហំពាណិជ្ជកម្មទ្វេភាគីឲ្យដល់ ១៥ពាន់លានដុល្លារ នៅឆ្នាំ២០២៥ និងសន្យាពង្រឹងទំនាក់ទំនងឲ្យកាន់តែស៊ីជម្រៅ។

ស្របពេលជាមួយគ្នានោះ ​លោកគូសបញ្ជាក់ថា ដំណើរទស្សនកិច្ចផ្លូវការលើកដំបូងរបស់លោក សេដ្ឋា មកកម្ពុជា គឺជាផ្នែកនៃដំណើរទស្សនកិច្ចរបស់នាយករដ្ឋមន្ត្រីថៃ ទៅកាន់បណ្តាប្រទេសជាសមាជិកអាស៊ាន ដើម្បីពង្រឹងទំនាក់ទំនងរវាងមេដឹកនាំនិងមេដឹកនាំ។

សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោក សេដ្ឋា ​មាន​គោលដៅ​ដូចគ្នា​ក្នុងការ​ដឹកនាំ​ប្រទេស​រៀងៗ​ខ្លួន​ ក្នុង​ទិសដៅ​ស្រដៀង​គ្នា​។ ភាគីទាំងពីរ ក៏បានសង្កត់ធ្ងន់ផងដែរ លើទំនាក់ទំនងជិតស្និទ្ធ ហើយបានព្រមព្រៀងគ្នាថា នេះគឺជាពេលវេលាដ៏ត្រឹមត្រូវ ដើម្បីបើកទំព័រថ្មីមួយនៅក្នុងទំនាក់ទំនងរវាងប្រទេសទាំងពីរ។

ក្នុងជំនួបនោះដែរ នាយករដ្ឋមន្ត្រីទាំងពីរ បានបញ្ជាក់យ៉ាងច្បាស់ថា នឹងធ្វើឲ្យប្រសើរឡើងនូវភាពជាដៃគូយុទ្ធសាស្ត្រ ហើយលោក សេដ្ឋា ថែមទាំងបានអញ្ជើញសម្តេចធិបតី ហ៊ុន ម៉ាណែត ឲ្យទៅបំពេញទស្សនកិច្ចនៅប្រទេសថៃ ទៀតផង៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ មេដឹកនាំកម្ពុជា-ថៃ  ឱ្យក្រសួងពាក់ព័ន្ធ ពិភាក្សា និង សហការគ្នា ដើម្បីកិច្ចសហប្រតិបត្តិការ ទទួលបានឧត្ដមប្រយោជន៍