ប្រធានក្រុមហ៊ុនអចលនទ្រព្យ ចិន Evergrande សង្ស័យជាប់ពាក់ព័ន្ធបទឧក្រិដ្ឋ

ក្រុមហ៊ុនអភិវឌ្ឍន៍ចិន Evergrande Group ដែល​ជំពាក់បំណុលរាប់ពាន់លានដុល្លារចេញបញ្ជាក់កាលពីថ្ងៃព្រហស្បតិ៍ថា ប្រធានក្រុមហ៊ុនរបស់ខ្លួន លោក Hui Ka Yan ត្រូវប៉ូលិស​សង្ស័យជាប់ពាក់ព័ន្ធនឹងបទឧក្រិដ្ឋ ហើយភាគហ៊ុននៅក្នុងក្រុមហ៊ុនត្រូវបានផ្អាករហូតដល់មានការជូនដំណឹងបន្ថែម ។

ការជួញដូរភាគហ៊ុនរបស់ក្រុមហ៊ុន Evergrande និងក្រុមហ៊ុនបុត្រសម្ព័ន្ធចំនួន ២ ផ្សេងទៀតត្រូវបានបញ្ឈប់នៅក្នុងទីក្រុងហុងកុងកាលពីថ្ងៃព្រហស្បតិ៍ ដោយបង្កឲ្យមានការភ័យខ្លាចអំពីសមត្ថភាពរបស់ក្រុមហ៊ុនក្នុងការរៀបចំរចនាសម្ព័ន្ធបំណុលដ៏ធំ ក៏ដូចជាការរំលាយអាជីវកម្មជាដើម ។

យោងតាមការ​ចុះផ្សាយពីសារព័ត៌មាន Bloomberg បានឲ្យដឹងថា លោក Hui Ka Yan ដែលធ្លាប់ជាបុរសមានបំផុតរបស់ប្រទេសចិន ​ត្រូវបានប៉ូលិសដាក់ការឃ្លាំមើលនៅក្នុងលំនៅដ្ឋានរបស់លោក ដោយមិនឲ្យមានការ​ទាក់ទ​ងជាមួយមនុស្សជុំវិញខ្លួន ឬចេញទៅក្រៅឡើយ ។

ទន្ទឹមនោះ ក្រុមហ៊ុនក៏បានបញ្ចាក់កាលពីថ្ងៃអាទិត្យដែរថា ខ្លួនមិនអាចចេញបំណុលថ្មីបាននោះទេ ខណៈដែលក្រុមហ៊ុនបុត្រសម្ព័ន្ធរបស់ខ្លួនគឺ Hengda Real Estate Group នៅចិនដីគោក ក៏កំពុងត្រូវបានស៊ើបអង្កេត ហើយការប្រជុំជាមួយម្ចាស់បំណុលក៏ត្រូវបានពន្យារពេល ។

ការប្រកាសនេះបានកើតឡើងតែប៉ុន្មានសប្តាហ៍ប៉ុណ្ណោះ បន្ទាប់ពីមានព័ត៌មានលេចចេញថា ប៉ូលិសចិនបានចាប់ផ្តើមការស៊ើបអង្កេតបទឧក្រិដ្ឋលើកដំបូងរបស់ពួកគេទៅកាន់ក្រុមហ៊ុន Evergrande ចាប់តាំងពីធ្លាក់ខ្លួនក្នុងបំណុលកាលពី ២ ឆ្នាំមុន ។ ទន្ទឹមនឹងនេះ ប៉ូលិសចិននៅទីក្រុង Shenzhen ក៏បានឃុំខ្លួនបុគ្គលិក​មួយចំនួននៅអង្គភាពគ្រប់គ្រងទ្រព្យសម្បត្តិរបស់ Evergrande ផងដែរ បន្ទាប់ពីក្រុមហ៊ុនបរាជ័យក្នុងការសងប្រាក់អ្នកវិនិយោគ។

Evergrande ធ្លាក់ខ្លួនក្នុងបំណុលសរុបចំនួន ៣២៨ ពាន់លានដុល្លារនៅចុងខែមិថុនា ហើយភាគហ៊ុនបានធ្លាក់ចុះពេញមួយសប្តាហ៍ ដោយសារការព្យាយាមរៀបចំរចនាសម្ព័ន្ធបំណុលឡើងវិញ ខណៈបច្ចុប្បន្នភាគហ៊ុនក្រុមហ៊ុនបានធ្លាក់ចុះជាង ៨០ ភាគរយ ចាប់តាំងពីបានបន្តការជួញដូរក្នុងខែសីហា បន្ទាប់ពីការផ្អាកអស់រយៈពេល ១៧ ខែ ។

ដោយឡែកក្រុមហ៊ុន Hengda Real Estate ដែលជាក្រុមហ៊ុនបុត្រសម្ព័ន្ធឈានមុខគេនៅចិនដីគោករបស់ Evergrande បានចេញ​បញ្ជាក់កាលពីថ្ងៃចន្ទថា ក្រុមហ៊ុននៅតែធ្វើការជាមួយភាគីទាំងអស់ដើម្បីដោះស្រាយហានិភ័យបំណុល បន្ទាប់ពីខ្លួនខកខានការទូទាត់លើមូលបត្របំណុលជាង ៥៤៧ លានដុល្លារ ។

ក្រុមហ៊ុន Evergrande បាននឹងកំពុងព្យាយាមអនុវត្តការរៀបចំរចនាសម្ព័ន្ធបំណុល ដែលគ្រប់គ្រងដោយរដ្ឋាភិបាល ។ ក្រុមហ៊ុនកំពុងរៀបចំផែនការសងបំណុលរាប់ពាន់លានដុល្លារ​ជាមួយម្ចាស់បំណុលអន្តរជាតិ ហើយក៏បានដាក់ពាក្យ​សុំការពារក្ស័យធនដូចគ្នានៅក្នុងសហរដ្ឋអាមេរិក ។

ប្រសិនបើការរៀបចំរចនាសម្ព័ន្ធបំណុលនេះត្រូវបានបរាជ័យ ហើយ Evergrande មិនអាចឈានដល់កិច្ចព្រមព្រៀងថ្មីជាមួយម្ចាស់បំណុលបាន នោះក្រុមហ៊ុនអាចប្រឈមនឹងការរំលាយចោល ហើយជាពិសេសនឹងឈានដល់ការបញ្ឈប់ប្រតិបត្តិការទាំងអស់របស់ក្រុមហ៊ុនតែម្ដង ៕

ប្រែសម្រួល៖ នាង រតនៈ

ប្រភព៖ CNN