លោក ពូទីន បង្គាប់អតីតមេទាហានស៊ីឈ្នួល រុស្ស៊ី ឲ្យត្រួតត្រាអង្គភាពប្រយុទ្ធ​ក្នុងសង្គ្រាមនៅ អ៊ុយក្រែន

ការិយាល័យប្រធានាធិបតីរុស្ស៊ីបានប្រកាសកាលពីថ្ងៃសុក្រថា លោកប្រធានាធិបតី វ្ល៉ាឌីមៀរ ពូទីន បានបង្គាប់ដល់អតីតមេបញ្ជាការក្រុមទាហានស៊ីឈ្នួល Wagner Group ឲ្យត្រួតត្រាការខុសត្រូវអង្គភាពប្រយុទ្ធស្ម័គ្រចិត្តក្នុងសង្គ្រាមនៅអ៊ុយក្រែន ។

នៅក្នុងជំនួបជាមួយលោក Andrei Troshev អតីតមេបញ្ជាការក្រុមទាហានស៊ីឈ្នួល Wagner Group នៅវិមានក្រឹមឡាំង, លោក ពូទីន បានកត់សម្គាល់ថា ការបង្គាប់បញ្ជានេះកើតមានឡើង ដោយសារតែអតីតមេទាហានស៊ីឈ្នួលរូបនេះធ្លាប់មានបទពិសោធន៍ប្រយុទ្ធឲ្យអង្គភាពស្ម័គ្រចិត្តអស់រយៈពេលជាង ១ ឆ្នាំមកហើយ ។

លោកប្រធានាធិបតីបានលើកឡើងទៀតថា លោក Troshev ដឹងពីបញ្ហាគ្រប់បែបយ៉ាងដែលត្រូវដោះស្រាយដើម្បីឲ្យការងារប្រយុទ្ធដំណើរការទៅដោយរលូនល្អ និងជោគជ័យបំផុត ជាពិសេសសមរភូមិប្រយុទ្ធនៅទីក្រុង Bakhmut ក្នុងតំបន់ភាគខាងកើតនៃសាធារណរដ្ឋ Donetsk ។

ពាក់ព័ន្ធនឹងបញ្ហានេះដែរ អ្នកនាំពាក្យវិមានក្រឹមឡាំង លោក Dmitry Peskov បានបញ្ជាក់ដែរថា ពេលនេះ លោក Troshev កំពុងធ្វើការឲ្យក្រសួងការពារជាតិរុស្ស៊ី ហើយលោកក៏នឹងទទួលបានយុទ្ធសាស្ត្រប្រយុទ្ធមួយចំនួនរបស់ក្រសួងសម្រាប់បំបែកខែលការពាររបស់សត្រូវផងដែរ ។

ទន្ទឹមនោះ ជំនួបនេះក៏ត្រូវបានគេមើលឃើញផងដែរថាជាការប៉ុនប៉ងរបស់វិមានក្រឹមឡាំងដើម្បីដាក់អ្នកប្រយុទ្ធរបស់ក្រុមទាហានស៊ីឈ្នួល Wagner Group ឲ្យស្ថិតនៅក្រោមការគ្រប់គ្រងដោយរដ្ឋាភិបាលរុស្ស៊ី ចាប់តាំងពីមេដឹកនាំរបស់ក្រុមមួយនេះគឺលោក Yevgeny Prigozhin បានធ្លាក់យន្តហោះស្លាប់កាលពីខែសីហា ក្រោយបរាជ័យការបះបោរប្រដាប់អាវុធរយៈពេលខ្លីកាលពីខែមិថុនាកន្លងទៅ ៕

ប្រែសម្រួលដោយ ៖ ជីវ័ន្ត

ប្រភព ៖ NHK