ព័ត៌មានអន្ដរជាតិ

សិង្ហបុរី ប្រមូលនំលោកខែរបស់ម៉ាឡេស៊ីមកវិញ ក្រោយរកឃើញបាក់តេរី ជាតិពុលច្រើនហួសហេតុ

បានផុស

១ year មុន

នៅ

ថ្ងៃសៅរ៍ ៣០ កញ្ញា ២០២៣

ដោយ

កាលពីថ្ងៃទី ២៨ ខែកញ្ញា អាជ្ញាធរសិង្ហបុរី បានបញ្ជាឲ្យប្រមូលមកវិញនូវផលិតផលនំសែនព្រះខែចំនួន ២ ដែលត្រូវបានលក់នៅទីនេះ ដោយសារពួកវាមានផ្ទុកសារធាតុផ្សំលើសពីកម្រិតកំណត់ ពោលគឺបាក់តេរី ឬជាតិពុលដែលផលិតដោយផ្សិត។

ផលិតផលដែលមានប្រភពពីប្រទេសម៉ាឡេស៊ីរួមមាន នំព្រះខែ Joymom ជាមួយនឹងកាលបរិច្ឆេទផុតកំណត់នៅថ្ងៃទី ០៥ ខែមីនា ឆ្នាំ ២០២៤ និងនំព្រះខែ Fragrance ជាមួយនឹងកាលបរិច្ឆេទផុតកំណត់នៅថ្ងៃទី ២០ខែតុលា ឆ្នាំ ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារចំណីអាហារសិង្ហបុរី (SFA) បាននិយាយនៅក្នុងសេចក្តីប្រកាសព័ត៌មានកាលពីម្សិលមិញថា ខ្លួនបានរកឃើញបាក់តេរី Staphylococcus aureus នៅក្នុងនំព្រះខែរបស់ Joymom ។ ចំណែកផលិតផលមួយទៀតមានផ្ទុកសារធាតុ aflatoxins ច្រើនដូចគ្នា។

SFA ក៏បាននិយាយបន្ថែមទៀតថា ទាំងបាក់តេរី Staphylococcus aureus និង aflatoxins គឺនៅកម្រិតលើសពីដែនកំណត់អតិបរមាដែលបានបញ្ជាក់ក្រោមបទប្បញ្ញត្តិអាហាររបស់ប្រទេសសិង្ហបុរី។ ជាវិធានការប្រុងប្រយ័ត្ន SFA បានដឹកនាំអ្នកនាំចូលរៀងៗខ្លួន Taste Right Pte Ltd និង Fragrance Foodstuff Pte Ltd ដើម្បីប្រមូលផលិតផលដែលពាក់ព័ន្ធ ហើយការប្រមូលមកវិញគឺកំពុងបន្តផងដែរ។

បាក់តេរី Staphylococcus aureus ត្រូវបានរកឃើញជាធម្មតានៅក្នុងបរិស្ថាន ហើយត្រូវបានរកឃើញនៅលើស្បែករបស់មនុស្ស ឬក្នុងច្រមុះផងដែរ។ វាជាមូលហេតុទូទៅនៃការពុលអាហារ ហើយអាចបណ្ដាលឲ្យមានការចាប់ផ្ដើមភ្លាមៗនៃរោគសញ្ញាចំពោះអ្នកដែលទទួលរងផលប៉ះពាល់ដូចជា ចង្អោរ ក្អួត រមួលពោះ និងរាគ។

ចំណែកឯ Aflatoxins អាចកើតមានក្នុងអាហារជាលទ្ធផលនៃការចម្លងរោគផ្សិត។ ឧទាហរណ៍នៃអាហារដែលអាចបំពុលដោយសារធាតុ aflatoxins រួមមានធញ្ញជាតិ គ្រាប់ និងគ្រាប់ប្រេង ព្រមទាំងអាហារកែច្នៃដែលមានសារធាតុផ្សំទាំងនេះ។ ពួកវាត្រូវបានគេស្គាល់ថាជា genotoxic (បំផ្លាញ DNA ឬហ្សែន) និងសារធាតុបង្កមហារីក ហើយការប៉ះពាល់តាមរយៈអាហារគួរតែត្រូវបានរក្សាទុកឲ្យទាបតាមដែលអាចធ្វើទៅបាន។

SFA បានបន្ថែមថា ភ្នាក់ងារបង្ករោគក្នុងអាហារដូចជា S. aureus អាចចូលទៅក្នុងដំណើរការផលិតនៅពេលដែលមានការចម្លងរោគ។ វាកើតឡើងនៅពេលដែលកម្មករ មិនអនុវត្តអនាម័យដៃល្អ។

យ៉ាងណាមិញ SFA បានណែនាំដល់អ្នកប្រើប្រាស់ដែលបានទិញផលិតផលដែលពាក់ព័ន្ធកុំបរិភោគវា។ ប្រសិនបើបានទទួលទានហើយ អ្នកប្រើមានការព្រួយបារម្ភអំពីសុខភាពរបស់ពួកគេ គួរតែស្វែងរកការប្រឹក្សាពីវេជ្ជសាស្រ្តនិងទាក់ទងអ្នកលក់ដើម្បីសាកសួរ៕

ប្រែសម្រួល៖ សាង ស្រីល័ក្ខ

ប្រភព៖mustsharenew

ចុចអាន៖នំ ៧ប្រភេទ ពេញនិយមក្នុងពិធីសែននំព្រះខែ សឹងតែរាល់ៗឆ្នាំ