ព្រះមហាក្សត្រ ថៃ ឡាយព្រះហស្តលេខាត្រាស់បង្គាប់តែងតាំងអគ្គស្នងការ​នគរបាលជាតិថ្មី

ព្រះមហាក្សត្រថៃព្រះបាទ មហាវ៉ាជីរ៉ា ឡុងកន នៅថ្ងៃសៅរ៍នេះបានសម្រេចព្រះទ័យឡាយព្រះហស្តលេខាត្រាស់បង្គាប់តែងតាំងនាយឧត្តមសេនីយ៍ Torsak Sukvimol ជាអគ្គស្នងការនគរបាលជាតិថ្មីរបស់ប្រទេសថៃ ។

ក្នុងព្រះរាជក្រឹត្យនោះ ព្រះមហាក្សត្រថៃទ្រង់បានដកតំណែងលោក Torsak Sukvimol ជា​អគ្គស្នងការ​រង​នគរបាល​ជាតិ ហើយត្រាស់បង្គាប់ឲ្យ​ឡើង​កាន់​តំណែង​ជា​អគ្គស្នងការ​នគរបាល​ជាតិ​ ខណៈព្រះរាជក្រឹត្យតែងតាំងនេះ នឹងចូលជាធរមាននៅថ្ងៃទី១ ខែតុលា ។

ទន្ទឹមនោះ ព្រះរាជក្រឹត្យត្រាស់បង្គាប់តែងតាំងលោក Torsak Sukvimol ជាអគ្គស្នងការនគរបាលជាតិថ្មីរបស់ថៃ ក៏ត្រូវបានចុះហត្ថលេខាអមដោយលោកនាយករដ្ឋមន្ត្រី សេដ្ឋា ថាវីស៊ីន ផងដែរ ។

គួរបញ្ជាក់ថា អគ្គស្នងការ​នគរបាល​ជាតិកាលពីថ្ងៃពុធបាន​អនុម័ត​តែងតាំង​លោក Torsak Sukvimol ឲ្យ​ឡើង​កាន់​តំណែងជំនួសលោកនាយឧត្តមសេនីយ៍ Damrongsak Kittiprapas ដែល​ចូល​និវត្តន៍​នៅ​ថ្ងៃ​ទី៣០ ខែ​កញ្ញានេះ ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ ប្រទេសអាស៊ាន ៦ ពួតដៃជាមួយ ចិន កម្ចាត់ឧក្រិដ្ឋកម្មឆ្លងដែនទាក់ទង ល្បែងស៊ីសងតាមអនឡាញ