ញូវយ៉ក បន្តដាក់ក្រុង ក្នុងភាពអាសន្នដល់ចុងសប្តាហ៍ ដោយសារទឹកជំនន់

ច្បាប់ដាក់ទីក្រុងញូវយ៉កក្នុងភាពមានអាសន្ន ដែលអនុញ្ញាតឲ្យមានការដឹកជញ្ជូន ឬបែងចែកធនធានលឿនជាងមុន ដើម្បីដោះស្រាយវិបត្តិទឹកជំនន់ នឹងបន្តរយៈពេល ៦ ថ្ងៃទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះ អភិបាលរដ្ឋញូវយ៉ក លោកស្រី Kathy Hochul បានព្រមានកាលពីថ្ងៃអាទិត្យទី១ខែតុលាថា ភ្លៀងធ្លាក់ខ្លាំង ដែលបណ្តាលឲ្យមានទឹកជំនន់ភ្លាមៗ នៅក្នុងទីក្រុង គឺឆ្លុះបញ្ចាំងពី “ភាពធម្មតាថ្មី” ដោយសារតែឥទ្ធិពលនៃបម្រែបម្រួលអាកាសធាតុ។

ភ្លៀងធ្លាក់ បានឈានដល់កម្រិត២០សង់ទីម៉ែត្រ នៅផ្នែកខ្លះនៃទីក្រុង ដែលមានប្រជាជនច្រើនជាងគេរបស់សហរដ្ឋអាមេរិកមួយនេះ។

ថ្វីបើហានិភ័យនៃទឹកជំនន់ក្នុងទីក្រុង បានស្រកចុះពាក់កណ្តាលហើយក៏ដោយ ប៉ុន្តែមន្ទីរពេទ្យមួយនៅសង្កាត់ Brooklyn បាននិយាយថា ខ្លួនបានជម្លៀសអ្នកជំងឺ និងបុគ្គលិកទាំងអស់ បន្ទាប់ពីមានការដាច់ចរន្តអគ្គិសនី។

ភ្លៀងធ្លាក់ខ្លាំង បានប្រែក្លាយផ្លូវមួយចំនួនទៅជាទន្លេ ដោយជាប់គាំងឡានក្រុង និងរថយន្តនានា ជាច្រើនម៉ោង ហើយបង្ខំឲ្យផ្លូវរថភ្លើងក្រោមដី និងផ្លូវរថភ្លើងធ្វើដំណើរមួយចំនួន ត្រូវបិទ។ ជើងហោះហើរក៏ត្រូវពន្យារពេល ឬលុបចោលផងដែរ ខណៈស្ថានីយមួយនៅអាកាសយានដ្ឋាន LaGuardia ត្រូវជម្លៀសមនុស្សចេញ។

ទោះបីជាយ៉ាងណាក៏ដោយ មកទល់ពេលនេះ មិនមានសេចក្តីរាយការណ៍អំពីមនុស្សស្លាប់ឬរបួស ក្នុងគ្រោះធម្មជាតិនេះទេ៕

ប្រែសម្រួល៖ Vann Vann

ប្រភព៖ Tuoi Tre

ចុចអាន៖ ញូវយ៉ក ប្រកាសអាសន្ន ដោយសារជំនន់ទឹកភ្លៀង ជន់លិចក្រុង