កាសែត The New York Times ៖ ពលរដ្ឋ អ៊ុយក្រែន កំពុងដើរសុំ និងរត់ពន្ធ​យន្តហោះដ្រូនយកប្រើលើសមរភូមិប្រយុទ្ធ

កាសែត The New York Times បានរាយការណ៍កាលពីពេលថ្មីៗនេះថា ប្រជាពលរដ្ឋអ៊ុយក្រែនមួយចំនួនត្រូវបានបង្ខំឲ្យដើរសុំ ក៏ដូចជារត់ពន្ធយន្តហោះគ្មានមនុស្សបើក និងសមាសធាតុផ្សុំរបស់យន្តហោះដើម្បីយកទៅប្រើប្រាស់នៅលើសមរភូមិ ដោយសារតែក្រុមហ៊ុនចិនកាត់បន្ថយការផ្គត់ផ្គង់យន្តហោះដ្រូនដល់រដ្ឋាភិបាលទីក្រុងកៀវ ។

កាលពីថ្ងៃទី១ ខែកញ្ញា រដ្ឋាភិបាលចិនបានដាក់ការត្រួតពិនិត្យលើការនាំចេញយន្តហោះគ្មានមនុស្សបើក និងឧបករណ៍ទាក់ទងនឹងយន្តហោះប្រភេទនេះមួយចំនួន ខណៈកាសែត The New York Times រាយការណ៍ថា ការគ្រប់គ្រងការនាំចេញរបស់ចិនអាចធ្វើឲ្យបញ្ហានៃខ្សែសង្វាក់ផ្គត់ផ្គង់របស់អ៊ុយក្រែន កាន់តែអាក្រក់ទៅៗនៅមុនរដូវរងា ។

ពាក់ព័ន្ធនឹងបញ្ហានេះដែរ លោក Oles Maliarevych មន្ត្រីម្នាក់នៅក្នុងកងពលតូចមេកានិចទី ៩២ របស់អ៊ុយក្រែនបាននិយាយថា “នៅពេលយប់យើងធ្វើបេសកកម្មទម្លាក់គ្រាប់បែក ហើយពេលថ្ងៃយើងគិតពីរបៀបដើម្បីទទួលបានយន្តហោះគ្មានមនុស្សបើកថ្មី ហើយយើងក៏កំពុងពិនិត្យមើលគ្រប់មធ្យោបាយដែលអាចធ្វើទៅបាន ក្នុងការនាំចេញយន្តហោះគ្មានមនុស្សបើកពីប្រទេសចិនផងដែរ ពីព្រោះចិនផលិតយន្តហោះប្រភេទនេះច្រើនជាងគេបំផុត” ។

ទន្ទឹមនោះ កាលពីខែមិថុនា អនុរដ្ឋមន្ត្រីអ៊ុយក្រែនទទួលបន្ទុកឧស្សាហកម្មយុទ្ធសាស្ត្របាននិយាយផងដែរថា រដ្ឋាភិបាលទីក្រុងកៀវកំពុងចរចាជាមួយក្រុមហ៊ុនផលិតអាវុធលោកខាងលិចអំពីការបង្កើតការផលិតអាវុធនៅអ៊ុយក្រែន រួមទាំងយន្តហោះគ្មានមនុស្សបើក ហើយថែមទាំងអាចចុះកិច្ចសន្យានៅប៉ុន្មានខែខាងមុខនេះតែម្ដង ។

ស្របពេលជាមួយគ្នានេះ កាសែត The New York Times ក៏បានរាយការណ៍កាលពីចុងខែសីហាថា អ៊ុយក្រែនកំពុងផលិតយន្តហោះគ្មានមនុស្សបើករយៈចម្ងាយឆ្ងាយប្រហែល ៦ ម៉ូដែល ក្នុងនោះរួមទាំងយន្តហោះដែលមានសមត្ថភាពហោះហើរបានជាង ១,០០០ គីឡូម៉ែត្រផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អឺរ៉ុប នឹងខំប្រឹងជួយ អ៊ុយក្រែន ដោយមិនចាំបាច់មាន អាមេរិក