ប្រជាជនប៉ូឡូញ ១លាននាក់ ចេញធ្វើបាតុកម្មទ្រង់ទ្រាយធំបំផុត ក្នុងប្រវត្តិសាស្រ្តទីក្រុង វ៉ាសូវី 

មនុស្សប្រហែលមួយលាននាក់ បានចូលរួមក្នុងការតវ៉ាប្រឆាំងរដ្ឋាភិបាលប៉ូឡូញ នៅរដ្ឋធានី វ៉ាសូវី ពោលគឺពីរសប្តាហ៍មុនការបោះឆ្នោតទូទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Monika Beuth អ្នកនាំពាក្យរដ្ឋាភិបាលប៉ូឡូញ និយាយថា មនុស្សប្រហែលមួយលាននាក់ បានចូលរួមក្នុងការតវ៉ាដែលរៀបចំដោយគណបក្សប្រឆាំង Civic Platform (PO) នៅទីក្រុងវ៉ាសូវី កាលពីថ្ងៃអាទិត្យទី១ខែតុលា។ លោកស្រីបញ្ជាក់ថា “​នេះគឺ​ជាបាតុកម្ម​ធំ​បំផុត​ក្នុង​ប្រវត្តិសាស្ត្រ​ទីក្រុងវ៉ាសូវី”។

ព្រឹត្តិការណ៍​នេះ​ ​កើត​ឡើងត្រឹម​តែ​ពីរ​សប្តាហ៍​ប៉ុណ្ណោះ ​មុន​ពេលប្រទេស​ប៉ូឡូញ ​រៀបចំ​ការ​បោះឆ្នោត​ទូទៅ​ដែល​គណបក្ស PO ពណ៌នា​ថា ​នឹង​សម្រេច​អនាគត​របស់​ប៉ូឡូញ ​ក្នុង​សហភាព​អឺរ៉ុប (EU)។

អតីតនាយករដ្ឋមន្ត្រីប៉ូឡូញ លោក Donald Tusk ដែលជាមេដឹកនាំគណបក្ស PO បានប្រាប់ក្រុមអ្នកគាំទ្រ នៅកណ្តាលទីក្រុង វ៉ាសូវី ថា “ការផ្លាស់ប្តូរទ្រង់ទ្រាយធំ ជិតកើតឡើងហើយ។ នេះគឺជាសញ្ញាមួយបង្ហាញថា ប៉ូឡូញកំពុងកើតជាថ្មី”។

ថ្វីបើលោក Tusk និយាយថា មនុស្សជិតមួយលាននាក់ មានវត្តមានក្នុងការតវ៉ានេះក៏ដោយ ប៉ុន្តែស្ថានីយទូរទស្សន៍ TVP ជិតស្និទ្ធនឹងរដ្ឋាភិបាលប៉ូឡូញ បានដកស្រង់ប្រភពពីប៉ូលិស ​ដែលអះអាងថា មនុស្សប្រហែល១០ម៉ឺននាក់ប៉ុណ្ណោះ បានចូលរួមក្នុងព្រឹត្តិការណ៍នេះ។

ការស្ទង់មតិមុនការបោះឆ្នោតបង្ហាញថា គណបក្សច្បាប់និងយុត្តិធម៌ (PiS) ដែលកំពុងកាន់អំណាចនឹងទទួលជ័យជម្នះ ប៉ុន្តែប្រហែលជាមិនទទួលបានអាសនៈគ្រប់គ្រាន់ ដើម្បីឈ្នះសំឡេងភាគច្រើននៅក្នុងសភាឡើយ ដោយសារតែប្រជាជនមិនពេញចិត្តនឹងការដឹកនាំដូចកាលមុន៕

ប្រែសម្រួល៖ Vann Vann

ប្រភព៖ VN Express

ចុចអាន៖ ប៉ូឡូញ ប្រកាសបញ្ជូនទ័ព ១ម៉ឺននាក់ទៀត ទៅព្រំដែន ដើម្បីបំភ័យ បេឡារុស