សត្វរមាសស៊ូម៉ាត្រាជិតផុតពូជ កើតនៅប្រទេស ឥណ្ឌូណេស៊ី

នៅថ្ងៃចន្ទ ទី២ ខែតុលា រដ្ឋាភិបាលឥណ្ឌូនេស៊ីបាននិយាយថា សត្វរមាសស៊ូម៉ាត្រាជិតផុតពូជកើតនៅប្រទេសរបស់ខ្លួន កាលពីថ្ងៃសៅរ៍ ទី៣០ ខែកញ្ញា ក្នុងតំបន់អភិរក្សមួយ ។

កូនរមាសខាងលើមិនទាន់មានឈ្មោះនៅឡើយទេ វាមានទម្ងន់ប្រហែល ២៧ គីឡូក្រាម និងកើតនៅឧទ្យានជាតិ Way Kambas ខេត្ត Lampung ។ បើតាមក្រសួងបរិស្ថាននិយាយថា គ្រាន់តែកើតបាន ៤៥ នាទីភ្លាម កូនរមាសអាចដើរបានហើយ ដល់ថ្ងៃបន្ទាប់វាដើរលេងជុំវិញព្រៃទៀតផង ។ ចំណែកឯម្ដាយវាវិញ ឈ្មោះ Ratu មានអាយុ ២២ ឆ្នាំ និងមានសុខភាពល្អធម្មតាទេ ។

លោក Siti Nurbaya រដ្ឋមន្ត្រីក្រសួងបរិស្ថានបាននិយាយនៅក្នុងសេចក្តីថ្លែងការណ៍ថា “នេះគឺជាដំណឹងដ៏រីករាយ មិនត្រឹមតែសម្រាប់ប្រទេសឥណ្ឌូនេស៊ីប៉ុណ្ណោះទេ ប៉ុន្តែសម្រាប់ពិភពលោកទាំងមូលតែម្ដង” ។

គួរជម្រាបថា សត្វរមាសស៊ូម៉ាត្រានៅសល់តែ ៨០ ក្បាលប៉ុណ្ណោះនៅលើពិភពលោក គិតត្រឹមឆ្នាំ ២០១៩ ។ ថនិកសត្វ Dicerorhinus sumatrensis គឺជាសត្វរមាសអាស៊ីតែមួយគត់ដែលមានស្នែងពីរ ហើយអាចធំឡើងដល់កម្ពស់ ១,៥ ម៉ែត្រ និងមានទម្ងន់ពី ៥០០ គីឡូក្រាមដល់ ៩៦០ គីឡូក្រាមឯណោះ ៕

ប្រែសម្រួល៖ វារី

ប្រភព៖ todayonline

ចុចអាន៖ ទាំងនេះជាសត្វកម្រ ១០​ប្រភេទ​ ដែលជិត​ផុតពូជពីផែនដី