អង់គ្លេស បញ្ចេញលុយ ៤.៨ ពាន់លានដុល្លារផលិតនាវាមុជទឹកវាយប្រហារ ក្រោមកិច្ចព្រមព្រៀង AUKUS

ចក្រភពអង់គ្លេសបានចុះហត្ថលេខាលើកិច្ចសន្យាដែលមានតម្លៃ ៤.៨ ពាន់លានដុល្លារជាមួយនឹងក្រុមហ៊ុនផលិតឈានមុខគេនៅក្នុងប្រទេស ដើម្បីបង្កើតនាវាមុជទឹកវាយប្រហារដ៏មានឥទ្ធិពល ហើយវាក៏ជាផ្នែកមួយនៃកិច្ចព្រមព្រៀងសម្ព័ន្ធភាពយោធាត្រីភាគី AUKUS ជាមួយប្រទេសអូស្ត្រាលី និងសហរដ្ឋអាមេរិក ។

យោងតាមរដ្ឋមន្ត្រីក្រសួងការពារជាតិចក្រភពអង់គ្លេសលោក Grant Shapps បាននិយាយនៅឯសមាជគណបក្សអភិរក្សថា “យើងបានចុះហត្ថលេខាលើកិច្ចសន្យាដែលមានតម្លៃ ៤.៨ ពាន់លានដុល្លារជាមួយនឹងអាជីវកម្មឈានមុខគេរបស់ចក្រភពអង់គ្លេស ដើម្បីជំរុញការអភិវឌ្ឍន៍នៃនាវាមុជទឹកវាយប្រហារដ៏មានឥទ្ធិពលបំផុតដែលមិនធ្លាប់មាន និងប្រតិបត្តិការដោយកងនាវាចររបស់អង់គ្លេស” ។

ប្រមុខការពារជាតិអង់គ្លេសរូបនេះបានបន្ថែមថា នាវាមុជទឹកឈ្មោះ “អ្នកប្រមាញ់ឃាតករ” ថ្មីនឹងអនុញ្ញាតឲ្យប្រទេសនេះរក្សាបាននូវអត្ថប្រយោជន៍ជាយុទ្ធសាស្ត្ររបស់ខ្លួននៅក្រោមសមុទ្រ និងជួយផ្តល់ការងាររាប់ពាន់កន្លែង ក៏ដូចជាប្រាក់ខែដល់ប្រជាពលរដ្ឋនៅក្នុងប្រទេសផងដែរ ។

លើសពីនេះ លោក Shapps បានថែមទាំងបានសង្កត់ធ្ងន់ថា ចក្រភពអង់គ្លេសក៏កំពុងដាក់ពង្រាយយន្តហោះចម្បាំង Typhoon នៅក្នុងប្រទេសប៉ូឡូញផងដែរ ដើម្បីការពារសម្ព័ន្ធមិត្តណាតូរបស់ខ្លួនពីការគំរាមកំហែងរបស់ប្រទេសរុស្ស៊ី ។

គួរបញ្ជាក់ថា អូស្ត្រាលី សហរដ្ឋអាមេរិក និងចក្រភពអង់គ្លេសបានប្រកាសពីភាពជាដៃគូការពារជាតិត្រីភាគីថ្មីមួយហៅថា AUKUS នៅក្នុងខែកញ្ញា ឆ្នាំ ២០២១ ខណៈគំនិតផ្តួចផ្តើមដំបូងរបស់ AUKUS គឺការអភិវឌ្ឍន៍បច្ចេកវិទ្យានាវាមុជទឹកដើរដោយថាមពលនុយក្លេអ៊ែរសម្រាប់កងទ័ពជើងទឹកអូស្ត្រាលី ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ មេទ័ព អង់គ្លេស ទទួលស្គាល់ថា ខែលការពាររុស្ស៊ី រឹងមាំជាងការគិត