ក្រុមហ៊ុនអចលនទ្រព្យចិន Evergrande បើកជួញដូរផ្សារហ៊ុនឡើងវិញ​ បន្ទាប់ពីផ្អាកមួយរយៈ

ក្រុមហ៊ុនអភិវឌ្ឍន៍អចលនទ្រព្យចិន Evergrande Group និងក្រុមហ៊ុនបុត្រសម្ព័ន្ធរបស់ខ្លួនដែលបានចុះបញ្ជីនៅហុងកុងឈ្មោះ Evergrande Property Services Group បានបន្តការជួញដូរឡើងវិញនៅថ្ងៃអង្គារនេះ បន្ទាប់ពីផ្អាកកាលពីថ្ងៃព្រហស្បតិ៍សប្តាហ៍មុន ។

ភាគហ៊ុនទាំងពីរបានបើកឡើងខ្ពស់ក្នុងការជួញដូរពេលព្រឹកថ្ងៃអង្គារនៅតម្លៃ ០.៣៥ ដុល្លារហុងកុង និង ០.៦៣ ដុល្លារហុងកុង ដោយកើនឡើង ៩ ភាគរយ និង ៧ ភាគរយ ។

ទោះជាយ៉ាងណា ក្រុមហ៊ុនបុត្រសម្ព័ន្ធមួយទៀតគឺ Evergrande New Energy Vehicle Group នៅ​តែបន្តផ្អាកជួញដូរដដែល បន្ទាប់ពីផ្សារហ៊ុនរបស់ក្រុមហ៊ុនទាំងបីត្រូវបានផ្អាកដូចគ្នា​កាលពីសប្តាហ៍មុន ហើយមិនបានបញ្ជាក់ពីមូលហេតុច្បាស់ឡើយ ។  

ពាក់ព័ន្ធនឹងការផ្អាកផ្សារហ៊ុននេះដែរ គឺដោយសារតែប្រធានក្រុមហ៊ុនលោក Hui Ka-yan កំពុងស្ថិតនៅក្រោមការឃ្លាំមើល និងស៊ើបអង្កេតលើបទសង្ស័យផ្ទេរទ្រព្យសម្បត្តិទៅក្រៅប្រទេស ខណៈបច្ចុប្បន្នក្រុមហ៊ុនក៏មិនទាន់បញ្ចប់គម្រោង​សងបំណុលវិនិយោគិនរួចរាល់នៅឡើយ ។

ដូចគ្នានេះ កាលពីសប្តាហ៍មុន ក្រុមហ៊ុនបុត្រសម្ព័ន្ធ​របស់ Evergrande មួយទៀតគឺ Hengda Real Estate Group ក៏មានករណីវិវាទសម្ភារៈដែលមិនទាន់សម្រេចចំនួន ១,៩៤៦ ករណីផងដែរ ដែលមានទំហំទឹកប្រាក់សរុប ៦២.៥ ពាន់លានដុល្លារ ៕

ប្រែសម្រួល៖ នាង រតនៈ

ប្រភព៖ Nikkei Asia

ចុចអាន៖ ប្រធានក្រុមហ៊ុន Evergrande ត្រូវបានស៊ើបអង្កេតលើបទសង្ស័យ​ផ្ទេរទ្រព្យសម្បត្តិ