រុស្ស៊ី ថា មិនចាំបាច់កែនទ័ពបន្ថែមឡើយ ព្រោះមានកម្លាំងយោធាគ្រប់គ្រាន់​សម្រាប់ប្រយុទ្ធនៅ អ៊ុយក្រែន ហើយ

រដ្ឋមន្ត្រីការពារជាតិរុស្ស៊ី លោក Sergey Shoygu បាននិយាយកាលពីថ្ងៃអង្គារថា ប្រទេសរុស្ស៊ីមិនមានផែនការកែនទ័ពបន្ថែមទៀតនោះទេ ដោយសារតែបច្ចុប្បន្នកងកម្លាំងទីក្រុងមូស្គូគឺមានគ្រប់គ្រាន់ហើយសម្រាប់បន្តប្រតិបត្តិសឹកនៅអ៊ុយក្រែន ។

លោក Shoygu បាននិយាយនៅក្នុងកិច្ចប្រជុំនៅទីក្រុងមូស្គូថា “យើងមិនចាំបាច់កែនកម្លាំងទ័ពបន្ថែមទៀតដើម្បីយកទៅប្រយុទ្ធជាមួយអ៊ុយក្រែននោះទេ ដោយសារយើងមានពលរដ្ឋជាង ៣៣៥,០០០ នាក់បានស្ម័គ្រចិត្តចូលបម្រើកងទ័ពជាមួយរុស្ស៊ី ចាប់តាំងពីដើមឆ្នាំមក ។

ទន្ទឹមនោះ លោកប្រធានាធិបតីរុស្ស៊ី វ្ល៉ាឌីមៀរ ពូទីន ក៏ធ្លាប់បានលើកឡើងស្រដៀងគ្នានេះផងដែរថា រុស្ស៊ីក៏មិនត្រូវការទាហានស៊ីឈ្នួលបរទេសនោះដែរ ដោយសារតែរុស្ស៊ីមានជនជាតិខ្លួនឯងប្រមាណ ៣០ ម៉ឺននាក់បានចុះកិច្ចសន្យាស្ម័គ្រចិត្តចូលបម្រើយោធា ហើយសុទ្ធតែជាអ្នកស្នេហាជាតិ ។

គួរបញ្ជាក់ថា ក្នុងសង្គ្រាមរយៈពេលជិត ២០ ខែមកនេះ យោធារុស្ស៊ីបានបំបាក់ និងធ្វើឲ្យទ័ពអ៊ុយក្រែនចុះខ្សោយយ៉ាងខ្លាំង ជាពិសេសអ៊ុយក្រែនបានបាត់បង់កម្លាំងទ័ពចំនួន ៧១,០០០ នាក់ក្នុងរយៈពេលត្រឹមតែ ៣ ខែប៉ុណ្ណោះនៃ “ប្រតិបត្តិការវាយបក” របស់ខ្លួន រួមជាមួយនឹងគ្រឿងសឹក ក៏ដូចជាសម្ភារៈដែលផ្តល់ដោយលោកខាងលិចជាច្រើនផ្សេងទៀតផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ប៉ូឡូញ ឲ្យរថក្រោះខ្លារខិន Leopard មួយទឹកៗទៅ អ៊ុយក្រែន