ចិន មិនមែនជាទេសចរ​លំដាប់លេខ ១ ​ចូលមកលេងកម្សាន្តនៅ ថៃ ឡើយ

នៅ​ក្នុងឆ្នាំ ២០២៣ នេះ ថៃដាក់ក្ដីរំពឹងថា​នឹងទទួលបានទេសចរ​អន្តរជាតិចំនួន ៣០ លាននាក់ចូលមកលេងកម្សាន្តក្នុងប្រទេស ​ប៉ុន្តែទោះជាយ៉ាងណា ត្រឹមរយៈពេល ៩ ខែ​មកនេះ ថៃទើបទទួលបានតែជាង ១៨ លាននាក់ប៉ណ្ណោះ ដោយក្នុងនោះ ទេសចរ​ដែលមានចំនួនច្រើនជាងគេបំផុតគឺមិនមែន​ចិនឡើយ ។

សម្រាប់រយៈពេល ៩ ខែ​នៃឆ្នាំ ២០២៣ នេះ ទេសចរដែលចូលមកលេងកម្សាន្ត​នៅថៃច្រើនបំផុតនោះគឺទេសចរម៉ាឡេស៊ី ដែលមានចំនួនរហូតដល់ជិត ៣ លាននាក់ ខណៈទេសចរចិនស្ថិតនៅលំដាប់ទី ២ មានចំនួនត្រឹមតែជាង ២.២​ លាននាក់ប៉ុណ្ណោះ ។

ទន្ទឹមនឹងនេះ ក្រៅពីម៉ាឡេស៊ី និងចិន​ដែលមានចំនួនច្រើនជាងគេ ក្នុងនោះប្រទេសកូរ៉េខាងត្បូងស្ថិតនៅលំដាប់លេខ ៣ មានទេសចរទៅថៃ​ជាង ​១.០៧ លាននាក់, ឥណ្ឌាមានចំនួន ១.០៣ លាននាក់ និងរុស្ស៊ីជាង ៩៣ ម៉ឺននាក់ ។

តាមរយៈទិន្នន័យនេះដែរ មានតែ​ទេសចរ​ម៉ាឡេស៊ីប៉ុណ្ណោះមានកំណើន ១៥.៥១ ភាគរយ ស្របពេលចិនបានធ្លាក់ចុះ ២៧.០៨ ភាគរយ ខណៈកូរ៉េខាងត្បូង ១០.៦០ ភាគរយ និងឥណ្ឌា ៤.២៨ ភាគរយ ប៉ុន្តែទេសចរតំបន់អាស៊ានមានការកើនឡើង ៨.២២ ភាគរយ ។

គួរបញ្ជាក់ថា ដើម្បី​ជំរុញ​កំណើនសេដ្ឋកិច្ច​ ថៃបានប្រើគោលនយោបាយ​លើកលែង​ទិដ្ឋាការ​ដល់ទេសចរ​ចិន រួមជាមួយកាហ្សាក់ស្ថាន​ ដែលអាចឲ្យទេសចរប្រទេសទាំងពីរនេះចូលមកកម្សាន្ត​ក្នុងប្រទេសថៃរហូតដល់ ៣០ ថ្ងៃ ៕

ប្រែសម្រួល៖ នាង រតនៈ

ប្រភព៖ The Nation

ចុចអាន៖ ប៉ូលិស ថៃ រឹបអូសវត្ថុតាងជាគ្រាប់ និងកាំភ្លើងពីផ្ទះក្មេងប្រុសដែលបាញ់ ប្រហារនៅផ្សារទំនើបកណ្ដាលក្រុងបាងកក