បាត់ខ្លួនទាហាន ២៣នាក់ ដោយសារភ្លៀងធ្លាក់ខ្លាំង នៅឥណ្ឌា

ដោយសារភ្លៀងធ្លាក់ខ្លាំងពេក ទឹកជំនន់បានបន្តជន់ឡើងបណ្ដាលឱ្យបាត់ខ្លួនទាហាចំនួន ២៣នាក់ ក្នុងរដ្ឋ Sikkim ភាគឦសាននៃប្រទេសឥណ្ឌា ខណៈផ្លូវនៅក្នុងទីក្រុងនៃរដ្ឋនេះត្រូវបានកាត់ផ្តាច់។ នេះបើតាមរបាយការណ៍ពីមន្ត្រីការពារជាតិបាននិយាយនៅថ្ងៃពុធ ទី៤ ខែតុលា ឆ្នាំ២០២៣។

អ្នកនាំពាក្យក្រសួងការពារជាតិបាននិយាយថា “បុគ្គលិកការពារជាតិចំនួន ២៣នាក់ត្រូវបានបាត់ខ្លួន ហើយរថយន្តមួយចំនួនត្រូវបានលិចនៅក្រោមជម្រាលភ្នំ ខណៈប្រតិបត្តិការស្វែងរកជនរងគ្រោះ កំពុងដំណើរការ” ។

មុនពេលបាត់ខ្លួនទាហាន នាយកដ្ឋានអាកាសធាតុរបស់ប្រទេសឥណ្ឌាបានព្រមានអំពីការរអិលបាក់ដី និងការរំខានដល់ជើងហោះហើរ ស្របពេលដែលភ្លៀងធ្លាក់ខ្លាំងត្រូវបានព្យាករណ៍នៅតំបន់ខ្លះនៃរដ្ឋ Sikkim ។

យោងតាមអ្នកនាំពាក្យកងទ័ពលោក Anjan Basumatary បាននិយាយថា ផ្លូវហាយវេដ៏សំខាន់ដែលតភ្ជាប់ពីរដ្ឋ Sikkim ទៅរដ្ឋ West Bengal ត្រូវបានខ្ទាស់ ហើយផ្លូវថ្នល់ត្រូវបានកាត់ផ្តាច់ទាំងស្រុង។

លោក V S Pathak ប្រធានរដ្ឋលេខាធិការបានប្រាប់សារព័ត៌មានរ៉យទ័រថា មនុស្សប្រហែល ១៥,០០០នាក់ដែលរស់នៅក្នុងតំបន់នោះទំនងជារងផលប៉ះពាល់ ហើយយ៉ាងហោចណាស់ស្ពានសំខាន់ៗចំនួន ៨ ត្រូវបានទឹកនាំទៅជាមួយ។ ពេលនេះដោយសារភ្លៀងនៅតែបន្តធ្លាក់បន្តឥតឈប់ និងព្យុះផ្គររន្ទះផង ប្រតិបត្តិការជួយសង្គ្រោះនៅក្នុងតំបន់ទឹកជំនន់ កំពុងរាំងស្ទះ៕

សូមទស្សនាវីដេអូខ្លីខាងក្រោម!

ប្រែសម្រួល៖ សន្យា

ប្រភព៖ Reuters

ចុចអាន៖ ក្នុងពេលមួយយប់ រុស្ស៊ី បាញ់ទម្លាញ់យន្តហោះគ្មានមនុស្សបើករបស់ អ៊ុយក្រែនអស់ ៣១គ្រឿង

ចុចអាន៖ ប៉ាគីស្ថាន បញ្ជាឲ្យជនជាតិអាហ្វហ្គានីស្ថាន ១.៧លាននាក់ ចេញពីប្រទេស