ប្រភពមួយទម្លាយថា អាមេរិក បានបញ្ជូនអាវុធរឹបអូសពីអ៊ីរ៉ង់ ទៅឲ្យអ៊ុយក្រែន

ដោយបានដកស្រង់សម្តីមន្ត្រីអាមេរិកសុំមិនបញ្ចេញឈ្មោះ, ទូរទស្សន៍ CNN បានរាយការណ៍កាលពីថ្ងៃពុធទី៤ខែតុលាថា ទីក្រុង​វ៉ាស៊ីនតោន ​បាន​រកឃើញវិធីស្រប​ច្បាប់ ​ដើម្បី​បញ្ជូន​អាវុធ ​និង​គ្រាប់​រំសេវ​ដែលរឹបអូសបានពី​អ៊ីរ៉ង់​ទៅឲ្យទីក្រុងកៀវ ខណៈទីបញ្ជាការកណ្តាលរបស់យោធាអាមេរិក (CENTCOM) បានប្រគល់គ្រាប់កាំភ្លើងមួយលានគ្រាប់​ ទៅឲ្យអ៊ុយក្រែនរួចទៅហើយកាលពីដើមសប្តាហ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម CNN, ការដឹកបញ្ជូនទៅនេះ អាចជួយសម្រាលនូវកង្វះខាតដ៏សំខាន់មួយចំនួន ដែលយោធាអ៊ុយក្រែនកំពុងប្រឈមមុខ ខណៈខ្លួនក៏កំពុងរង់ចាំទាំងលុយកាក់ និងសម្ភារជាច្រើនទៀត ពីសហរដ្ឋអាមេរិកនិងសម្ព័ន្ធមិត្ត។

នៅក្នុងសេចក្តីប្រកាសព័ត៌មានមួយកាលពីថ្ងៃពុធ CENTCOM និយាយថា ខ្លួនបានបញ្ចប់ការផ្ទេរគ្រាប់មួយលានគ្រាប់ទៅកាន់អ៊ុយក្រែនរួចទៅហើយ កាលពីពីរថ្ងៃមុន។ យោធាពន្យល់ថា រដ្ឋាភិបាលសហរដ្ឋអាមេរិក ទទួលបានកម្មសិទ្ធិលើអាវុធទាំងនេះនៅថ្ងៃទី២០ខែកក្កដាឆ្នាំ២០២៣ តាមរយៈការទាមទារសំណងរដ្ឋប្បវេណីរបស់ក្រសួងយុត្តិធម៌ ប្រឆាំងនឹងកងឆ្មាំបដិវត្តន៍ឥស្លាមអ៊ីរ៉ង់ (IRGC)។

ការរឹបអូសទ្រព្យសម្បត្តិរដ្ឋប្បវេណី គឺជាការអនុវត្តដែលអនុញ្ញាតឲ្យរដ្ឋាភិបាលសហរដ្ឋអាមេរិក រឹបអូសយកទ្រព្យសម្បត្តិណា ដែលសង្ស័យថា ត្រូវបានប្រើប្រាស់ក្នុងសកម្មភាពឧក្រិដ្ឋ ប៉ុន្តែរឿងនេះ ត្រូវបានគេរិះគន់ជាយូរមកហើយថា ជា ចោរលាក់មុខ។

ការ​ប្រកាស​កាលពី​ថ្ងៃ​ពុធ​ ​កើត​ឡើង​ចំពេល​មាន​ភាព​មិន​ប្រាកដប្រជា​អំពី​ការ​ផ្តល់​មូលនិធិ​បន្ថែម​ទៀត​របស់​សហរដ្ឋ​អាមេរិក ​ក្នុង​សង្រ្គាមរុស្ស៊ី-​អ៊ុយក្រែន។ ការសម្របសម្រួលនៅនាទីចុងក្រោយរវាងគណបក្សប្រជាធិបតេយ្យ និងសាធារណរដ្ឋកាលពីថ្ងៃទី៣០ខែកញ្ញា បានបញ្ចៀសការបិទរដ្ឋាភិបាលទីក្រុងវ៉ាស៊ីនតោន ប៉ុន្តែមិនដាក់បញ្ចូលប្រាក់បន្ថែមទៀតសម្រាប់ជួយទីក្រុងកៀវនោះទេ៕

ប្រែសម្រួល៖ Vann Vann

ប្រភព៖ RT

ចុចអាន៖ ណាតូ ព្រមានថា មហាអំណាចយោធាលោកខាងលិច ជិតអស់គ្រាប់ឲ្យអ៊ុយក្រែនហើយ ព្រោះប្រទេសខ្លះ ជួយឡើងអស់ពីខ្លួន