រុស្ស៊ី ថា អ្នកស្រឡាញ់ចូលចិត្តផ្ដល់ជំនួយឲ្យ អ៊ុយក្រែន គួរមើលលទ្ធផលការ​បណ្ដេញប្រធានរដ្ឋសភា អាមេរិក

លោក Dmitry Medvedev អនុប្រធានក្រុមប្រឹក្សាសន្តិសុខរុស្ស៊ីបាននិយាយថា ការជ្រុះចេញពីតំណែងជាប្រធានរដ្ឋសភាសហរដ្ឋអាមេរិករបស់លោក Kevin McCarthy គឺជាលទ្ធផលបង្ហាញយ៉ាងជាក់ច្បាស់ចំពោះអ្នកដែលស្រឡាញ់ចូលចិត្តចំពោះការផ្ដល់ហិរញ្ញប្បទានដល់ប្រទេសអ៊ុយក្រែន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Medvedev បានកត់សម្គាល់ថា “ជាលើកដំបូងហើយក្នុងប្រវត្តិសាស្ត្ររបស់សហរដ្ឋអាមេរិក ដែលប្រធានរដ្ឋសភាបានលាលែងពីតំណែង ។ នេះសបញ្ជាក់ឲ្យឃើញយ៉ាងច្បាស់ថា ដោយសារតែលោក McCarthy មានការស្រឡាញ់ពេញចិត្តជាមួយរដ្ឋាភិបាលទីក្រុងកៀវពេក ជាពិសេសគឺការសម្របសម្រួលផ្ដល់លុយកាក់ដល់អ្នកដើរតាមហ៊ីត្លែរ គឺក្រុម Banderites នៅអ៊ុយក្រែន” ។

ទន្ទឹមនោះ អតីតប្រធានាធិបតីរុស្ស៊ីរូបនេះបញ្ជាក់ទៀតថា លោកមានមោទនភាពចំពោះរឿងនេះខ្លាំងមែនទែន ពីព្រោះវាគឺជាជម្រើសដ៏ល្អសម្រាប់ការដោះស្រាយបញ្ហាផ្ទៃក្នុងជាច្រើនដែលកើតមានក្នុងសហរដ្ឋអាមេរិក ។

បន្ថែមពីនេះ លោកក៏បានរំលឹកឡើងវិញនូវសេចក្តីថ្លែងការណ៍នាពេលថ្មីៗនេះ ពីសំណាក់អ្នកនាំពាក្យសេតវិមាន លោក John Kirby ផងដែរ ក្រោយពេលអ្នកការទូតរូបនេះលើកឡើងថា សហរដ្ឋអាមេរិកមានលុយគ្រប់គ្រាន់សម្រាប់ផ្តល់ហិរញ្ញប្បទានដល់អ៊ុយក្រែនត្រឹមតែរយៈពេល ២ ខែទៀតប៉ុណ្ណោះ” ។

គួរបញ្ជាក់ថា បច្ចុប្បន្នលោក Patrick McHenry សមាជិកសភារបស់គណបក្សសាធារណរដ្ឋមកពីរដ្ឋ North Carolina ត្រូវបានប្រកាសឲ្យអង្គុយកៅអីជាប្រធានរដ្ឋសភាស្តីទី រហូតដល់មានការបោះឆ្នោតជ្រើសតាំងថ្មី ខណៈលោក McCarthy កាន់តំណែងមួយនេះបានត្រឹមរយៈពេល ២៦៩ ថ្ងៃប៉ុណ្ណោះ ក្រោយការជ្រើសតាំងកាលពីថ្ងៃទី១៥ ខែមករា ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ តើមូលហេតុអ្វីខ្លះទើបប្រធានរដ្ឋសភា អាមេរិក ជ្រុះចេញពីតំណែង ហើយប៉ះ​ពាល់យ៉ាងណាដល់ អ៊ុយក្រែន?