ទឹកជំនន់នៅឥណ្ឌា សម្លាប់មនុស្ស ១៤នាក់ និងបាត់ខ្លួនជាង ១០០នាក់

មនុស្សយ៉ាងហោចណាស់ ១៤នាក់បានស្លាប់ និង ១០២នាក់កំពុងបាត់ខ្លួន បន្ទាប់ពីមានភ្លៀងធ្លាក់ខ្លាំងបណ្តាលឱ្យបឹងទឹកកកហិម៉ាឡៃនៅភាគឦសានប្រទេសឥណ្ឌាបានបំបាក់ច្រាំងទន្លេ ខណៈក្រុមអ្នកជួយសង្គ្រោះកំពុងត្រូវបានរារាំងដោយស្ពានដែលទឹកជន់លិច និងទន្លេដែលហូរលឿនខ្លាំង។

បើតាមការបញ្ជាក់ពីអាជ្ញាធរមូលដ្ឋានបានឱ្យដឹងថា បឹង Lhonak ក្នុងរដ្ឋ Sikkim បានបាក់ច្រាំង កាលពីថ្ងៃពុធ បណ្តាលឱ្យមានទឹកជំនន់ដ៏ធំ និងឱ្យប៉ះពាល់ដល់អាយុជីវិតមនុស្ស ២២,០០០នាក់។

អ្នកនាំពាក្យក្រសួងការពារជាតិបាននិយាយថា “ប្រតិបត្តិការស្វែងរកកំពុងត្រូវបានអនុវត្តក្រោមមេឃធ្លាក់ភ្លៀងឥតឈប់ឈរ ហើយទឹកដែលហូរយ៉ាងលឿននៅក្នុងទន្លេ Teesta បណ្ដាលឱ្យផ្លូវថ្នល់ និងស្ពានត្រូវទឹកជំនន់នាំទៅជាមួយ” ។

គិតត្រឹមព្រឹកថ្ងៃព្រហស្បតិ៍នេះ ទីភ្នាក់ងារគ្រប់គ្រងគ្រោះមហន្តរាយរបស់រដ្ឋបាននិយាយថា មនុស្ស ២៦នាក់បានរងរបួស និង ១០២នាក់កំពុងបាត់ខ្លួន ក្នុងនោះ ២២នាក់ជាបុគ្គលិកយោធា។ មិនតែប៉ុណ្ណោះស្ពាន​ចំនួន ១១​កន្លែង​ត្រូវ​បាន​ទឹក​ជន់​លិច មិនអាចឆ្លងកាត់បានឡើយ។ ​រីឯប្រជាជនរស់នៅក្នុងទីក្រុងកំពុងខ្វះខាតឥន្ទនៈ និងស្បៀង៕

ប្រែសម្រួល៖ សន្យា

ប្រភព៖ Reuters

ចុចអាន៖ បាត់ខ្លួនទាហាន ២៣នាក់ ដោយសារភ្លៀងធ្លាក់ខ្លាំង នៅឥណ្ឌា