UN បង្ហាញប្រទេសតែ៥ប៉ុណ្ណោះ ដែលអាច ជួយជំរុញកំណើនសេដ្ឋកិច្ចសកលបាន

សន្និសីទអង្គការសហប្រជាជាតិស្តីពីពាណិជ្ជកម្មនិងអភិវឌ្ឍន៍ (UNCTAD) បានព្រមានអំពីការធ្លាក់ចុះនៃសេដ្ឋកិច្ចពិភពលោក ជាមួយនឹងកំណើនយឺត នៅក្នុងតំបន់ភាគច្រើន ហើយមានតែប្រទេសមួយចំនួនប៉ុណ្ណោះ ដែលអាចរារាំងនិន្នាការនេះបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរបាយការណ៍របស់ខ្លួនកាលពីថ្ងៃព្រហស្បតិ៍ ទី៥ ខែតុលា កំណើនសេដ្ឋកិច្ចពិភពលោក ត្រូវបានគេរំពឹងថានឹងថយចុះពី ៣% កាលពីឆ្នាំមុនមកត្រឹម ២.៤% ក្នុងឆ្នាំ ២០២៣ នេះ ។ តំបន់ទាំងអស់ លើកលែងតែអាស៊ីបូព៌ា និងអាស៊ីកណ្តាលប៉ុណ្ណោះ ត្រូវបានគេព្យាករថា នឹងមានកំណើនយឺតជាងឆ្នាំ២០២២ ខណៈអឺរ៉ុប ជាតំបន់មានការធ្លាក់ចុះខ្លាំងបំផុត។

របាយការណ៍ខាងលើបង្ហាញថា ប្រទេសសេដ្ឋកិច្ចមួយចំនួន រួមមានប្រេស៊ីល ចិន ឥណ្ឌា ជប៉ុន ម៉ិកស៊ិក រុស្ស៊ី និងសហរដ្ឋអាមេរិក បានបង្ហាញភាពធន់នៅឆ្នាំ២០២៣។ យ៉ាងណាក្តី ក្នុងចំណោមប្រទេស G20 មានតែប្រេស៊ីល ចិន ជប៉ុន ម៉ិកស៊ិក និងរុស្ស៊ីប៉ុណ្ណោះ ដែលគេមើលឃើញថា អាចជួយជំរុញកំណើនសេដ្ឋកិច្ចបាន។

គេព្យាករថា កំណើន GDP របស់រុស្ស៊ី នឹងមាន ២.២% ក្នុងឆ្នាំ២០២៣ និង ២% ក្នុងឆ្នាំ២០២៤ ។ ទំហំនៃការនាំចេញថាមពលទាំងមូលរបស់ប្រទេសនេះ មិនមានការផ្លាស់ប្តូរខ្លាំងទេ ហើយភាគច្រើននៅតែមានស្ថិរភាព។

UNCTAD បញ្ជាក់ថា ការស្ទុះងើបឡើងវិញក្រោយជំងឺរាតត្បាតសកល គឺមានភាពខុសប្លែកគ្នាច្រើនដូចជា វិសមភាព ការពង្រីកការប្រមូលផ្តុំទីផ្សារ និងបន្ទុកបំណុលដែលកើនឡើងខ្ពស់ ខណៈភាពខុសគ្នាទាំងនេះ បានបង្កើនក្តីព្រួយបារម្ភអំពីផ្លូវឆ្ពោះទៅមុខសម្រាប់សេដ្ឋកិច្ចពិភពលោក៕

ប្រែសម្រួល៖ Vann Vann

ប្រភព៖ RT

ចុចអាន៖ លោក សំបូរ មាណ្ណារ៉ា ថា យុវជនត្រូវដឹងពីនយោបាយជាតិ សេដ្ឋកិច្ច ដើម្បីចូលរួមអភិវឌ្ឍន៍ជាតិ