លោក ពូទីន៖ រុស្ស៊ី មិនមែនជាអ្នកផ្តើមជម្លោះនៅអ៊ុយក្រែនទេ ប៉ុន្តែជាអ្នក កំពុងព្យាយាមបញ្ចប់វាទៅវិញ

ថ្លែងក្នុងសុន្ទរកថានៅឯក្លឹបពិភាក្សាអន្តរជាតិ Valdai កាលពីថ្ងៃព្រហស្បតិ៍ទី៥ខែតុលា លោក វ្ល៉ាឌីមៀរ ពូទីន បានអះអាងថា រុស្ស៊ីមិនមែនជាអ្នកផ្តើមជម្លោះនៅអ៊ុយក្រែនទេ ប៉ុន្តែផ្ទុយទៅវិញខ្លួនកំពុងព្យាយាមបញ្ចប់ជម្លោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកនិយាយថា “យើងមិនមែនជាអ្នករៀបចំរដ្ឋប្រហារបង្ហូរឈាមក្នុងទីក្រុងកៀវទេ។ មិនមែនជាយើងឡើយ ដែលបំភិតបំភ័យពលរដ្ឋនៅ គ្រីមៀ និង Sevastopol ជាមួយនឹងការបោសសម្អាតជនជាតិភាគតិចតាមបែប ណាស៊ី។ យើង​មិន​មែនជាអ្នក​ប្រើ​គ្រាប់​ផ្លោងនិង​ការ​ទម្លាក់​គ្រាប់​បែក ដើម្បី​បង្ខំឲ្យតំបន់ Donbass ​គោរព​តាមនោះ​ទេ​ ហើយយើងក៏មិនមែនជាអ្នកដែលគំរាមប្រើអំពើហិង្សា ប្រឆាំងនឹងអ្នកដែលចង់និយាយភាសាកំណើតរបស់ពួកគេដែរ”។

លោកសង្កត់ធ្ងន់ថា គឺជាទីក្រុងកៀវ ដែលបានប្រើរថក្រោះនិងកាំភ្លើងធំ ដើម្បីធ្វើសង្គ្រាមប្រឆាំងនឹងតំបន់ Donbass។ ថ្វីបើជនស៊ីវិល និងកុមារ ត្រូវបានសម្លាប់នៅ Donbass ជាយូរមកហើយ មុនពេលរុស្ស៊ីចាប់ផ្តើមប្រតិបត្តិការយោធារបស់ខ្លួនកាលពីឆ្នាំមុនក៏ដោយ ក៏គ្មានប្រទេសណាផ្សេង ជាពិសេសនៅលោកខាងលិច យកចិត្តទុកដាក់ចំពោះរឿងនេះដែរ។

លោកពូទីនបានកត់សម្គាល់ទៀតថា “សង្រ្គាមដែលចាប់ផ្តើមដោយរបបក្រុងកៀវ ជាមួយនឹងការគាំទ្រយ៉ាងសកម្មនិងដោយផ្ទាល់ពីលោកខាងលិច ឥឡូវនេះបានឈានចូលដល់ឆ្នាំទី ១០ ហើយ ហើយប្រតិបត្តិការយោធាពិសេសគឺមានគោលបំណងបញ្ឈប់វា”។

ស្របពេលជាមួយគ្នានោះ លោកថែមទាំងបានគូសបញ្ជាក់ទៀតថា ជម្លោះជាមួយអ៊ុយក្រែនមិនមែនបង្កឡើងដោយមហិច្ឆតាទឹកដីទេ។ រុស្ស៊ីគឺជាប្រទេសធំជាងគេលើពិភពលោករួចទៅហើយ ដូច្នេះមិនចាំបាច់ត្រូវស្វែងរកទឹកដីថ្មីឡើយ។ រុស្ស៊ី​នៅ​មាន​ការងារ​ជា​ច្រើន​ដែល​ត្រូវ​ធ្វើ ​ក្នុង​ការ​អភិវឌ្ឍ​តំបន់​ដាច់ស្រយាល​ស៊ីបេរី និង​តំបន់ចុង​បូព៌ា៕

ប្រែសម្រួល៖ Vann Vann

ប្រភព៖ RT

ចុចអាន៖ លោក ពូទីន ប្រកាសថា ប្រទេសរុស្ស៊ីធំជាងគេហើយ មិនចង់បានទឹកដី ថែមទៀតទេ