លោក ត្រាំ អះអាងថា នឹងព្រមធ្វើជាប្រធានរដ្ឋសភា អាមេរិក

អតីតប្រធានាធិបតីអាមេរិក លោក ដូណាល់ ត្រាំ បាននិយាយថា លោកត្រៀមខ្លួនរួចជាស្រេចអស់ហើយដើម្បីក្លាយជាប្រធានរដ្ឋសភាបណ្តោះអាសន្នក្នុងរយៈពេលដ៏ខ្លី រហូតដល់គណបក្សសាធារណរដ្ឋជ្រើសរើសបានបេក្ខជនមកអង្គុយលើកៅអីនេះជាអចិន្ត្រៃយ៍ ។

លោក ត្រាំ បានប្រាប់ប្រព័ន្ធផ្សព្វផ្សាយអាមេរិកកាលពីថ្ងៃព្រហស្បតិ៍ថា “មានគេសួរខ្ញុំច្រើន តើខ្ញុំនឹងទទួលយកតំណែងជាប្រធានរដ្ឋសភារយៈពេលខ្លីឬក៏យ៉ាងណា ហើយខ្ញុំក៏ឆ្លើយថា ប្រសិនបើគណបក្សសាធារណរដ្ឋមិនអាចជ្រើសរើសបេក្ខជនណាផ្សេងបាន ខ្ញុំនឹងធ្វើជាប្រធានរដ្ឋសភា បើវាចាំបាច់” ។

ទន្ទឹមនោះ អតីតប្រធានាធិបតីរូបនេះមិនបានបញ្ជាក់ថាតើអ្នកណាពិតប្រាកដដែលស័ក្តិសមសម្រាប់តំណែងប្រធានរដ្ឋសភានោះទេ ប៉ុន្តែលោកនឹងសុខចិត្តអង្គុយកៅអីនេះក្នុងរយៈពេលពី ៣០ ទៅ ៩០ ថ្ងៃ ប្រសិនបើគណបក្សសាធារណរដ្ឋបរាជ័យក្នុងការទទួលយកមតិទូទៅលើតំណែងមួយនេះ ។

ទោះបីជាយ៉ាងណាក៏ដោយ នៅក្រោមច្បាប់របស់គណបក្សសាធារណរដ្ឋ, លោក ត្រាំ អាចមិនមានសិទ្ធិក្នុងការទទួលបានតំណែងជាប្រធានរដ្ឋសភានោះទេ ចាប់តាំងពីលោកត្រូវបានចោទប្រកាន់លើបទឧក្រិដ្ឋជាច្រើន ប៉ុន្តែប្រសិនបើសមាជិកសភាមកពីគណបក្សសាធារណរដ្ឋចង់បានលោក ត្រាំ ឲ្យអង្គុយកៅអីមុខតំណែងមួយនេះ ច្បាប់អាចត្រូវបានផ្លាស់ប្តូរដោយការបោះឆ្នោត ។

គួរបញ្ជាក់ថា មកទល់នឹងពេលនេះ មានសមាជិកសភាតែ ២ នាក់ប៉ុណ្ណោះបានដាក់ពាក្យស្នើសុំជាផ្លូវការសម្រាប់តំណែងជាប្រធានរដ្ឋសភា ក្នុងនោះគឺតំណាងរាស្រ្តមកពី Los Angeles លោក Steve Scalise និងលោក Jim Jordan តំណាងរាស្ត្រមកពីរដ្ឋ Ohio ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ លោក បៃដិន ប្ដូរចិត្តមកធ្វើតាមគោលនយោបាយលោក ត្រាំ បន្តសាងសង់ ជញ្ជាំងព្រំដែន អាមេរិក-ម៉ិកស៊ិក