ទីបំផុត អ៊ីស្រាអែល ប្រកាសសង្គ្រាមជាផ្លូវការជាមួយក្រុម ហាម៉ាស់

ការិយាល័យរបស់នាយករដ្ឋមន្ត្រី Benjamin Netanyahu បាននិយាយថា គណៈរដ្ឋមន្ត្រីសន្តិសុខអ៊ីស្រាអែល បានបោះឆ្នោតកាលពីយប់ថ្ងៃអាទិត្យទី៨ខែតុលា ដើម្បីធ្វើសង្គ្រាមជាផ្លូវការ ​បន្ទាប់ពីក្រុមប្រដាប់អាវុធប៉ាឡេស្ទីន ហាម៉ាស់ បើកការវាយប្រហារទ្រង់ទ្រាយធំលើប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការិយាល័យរបស់លោក Netanyahu សង្កត់ធ្ងន់ថា ការយកមាត្រា៤០នៃច្បាប់មូលដ្ឋានរបស់អ៊ីស្រាអែលមកប្រើ គឺអនុញ្ញាតឲ្យរដ្ឋាភិបាលចាត់វិធានការយោធាដ៏សំខាន់ ដើម្បីធ្វើសង្រ្គាម។

យោង​តាម​ច្បាប់​នេះ នាយក​រដ្ឋមន្ត្រី ​នឹង​អាច​ធ្វើ​ការ​សម្រេច​ចិត្ត​ជាក់​លាក់ ​ទាក់​ទង​នឹង​សង្គ្រាម ដោយ​គ្រាន់​តែ​មាន​ការ​យល់ព្រម​ពី​គណៈរដ្ឋមន្ត្រី​សន្តិសុខ។

ការិយាល័យរបស់លោក Netanyahu ក៏បាននិយាយផងដែរថា រដ្ឋាភិបាល បានស្នើសុំសភាអ៊ីស្រាអែល ឲ្យអនុវត្តបទប្បញ្ញត្តិគ្រាអាសន្ន ដែលអនុញ្ញាតឲ្យដាក់ឃុំជនសង្ស័យក្នុងរយៈពេលវែងជាងធម្មតា ដោយមិនចាំបាច់ឡើងតុលាការ។

រឿងនេះកើតឡើង ខណៈអ៊ីស្រាអែលបញ្ជាក់ថា​ តួលេខអ្នកស្លាប់នៅក្នុងប្រទេស បន្ទាប់ពីការវាយប្រហារដ៏គួរឲ្យភ្ញាក់ផ្អើលមួយដោយក្រុមសកម្មប្រយុទ្ធ ហាម៉ាស់ បានកើនឡើងដល់៧០០នាក់។

ទូរទស្សន៍សាធារណៈ Kan និងប៉ុស្តិ៍លេខ 12 ក៏ដូចជាកាសែត Haaretz និង Times of Israel សុទ្ធតែបានរាយការណ៍ពីចំនួនអ្នកស្លាប់ដូចគ្នានេះ កាលពីថ្ងៃអាទិត្យ។

ដោយឡែកមន្ត្រីប៉ាឡេស្ទីននិយាយថា មនុស្សជាង ៣០០នាក់ត្រូវបានសម្លាប់ នៅក្នុងតំបន់ហ្គាហ្សា៕

ប្រែសម្រួល៖ Vann Vann

ប្រភព៖ RT

ចុចអាន៖ ក្រសួងការបរទេសកម្ពុជា ទទូចឱ្យអន្តរជាតិ បង្កើនការសម្របសម្រួលកិច្ចចរចារ ដើម្បីកាត់បន្ថយអំពើហិង្សា