អ៊ីស្រាអែល បញ្ចប់ដំណាក់កាលដំបូងនៃប្រតិបត្តិការ “ដាវដែក” សងសឹកលើ ក្រុមហាម៉ាស់

នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា អ៊ីស្រាអែលបានបញ្ចប់ដំណាក់កាលដំបូងនៃប្រតិបត្តិការដាវដែក (Iron Swords) ដែលចាប់ផ្តើមឡើងដើម្បីជាការសងសឹកទៅនឹងការវាយប្រហារទ្រង់ទ្រាយធំរបស់ក្រុមហាម៉ាស់ចេញពីតំបន់ហ្គាហ្សាស្ទ្រីប ។

លោក Netanyahu បានសរសេរនៅលើបណ្តាញសង្គម X ថា “ដំណាក់កាលទីមួយនៃប្រតិបត្តិការដាវដែក (Iron Swords) កំពុងត្រូវបានបញ្ចប់ដោយប្រើពេលតែប៉ុន្មានម៉ោងប៉ុណ្ណោះ ខណៈដែលកងកម្លាំងភាគច្រើនរបស់សត្រូវ ដែលបានរុលចូលក្នុងទឹកដីរបស់យើង ត្រូវបានកម្ចាត់” ។

ស្របពេលជាមួយគ្នានេះ លោកនាយករដ្ឋមន្ត្រីបានប្រកាសទៀតថា “ប្រទេសអ៊ីស្រាអែលក៏កំពុងចាប់ផ្តើមការវាយលុកទ្រង់ទ្រាយធំបន្ថែមទៀតផងដែរ ហើយនឹងបន្តការប្រយុទ្ធដោយឥតឈប់ឈរ រហូតដល់គោលដៅរបស់យើងបានសម្រេច” ។

គួរបញ្ជាក់ថា នៅព្រឹកព្រលឹមថ្ងៃសៅរ៍ ទី៧ ខែតុលា ក្រុមហាម៉ាស់បានបើកការវាយប្រហារចេញពីតំបន់ហ្គាហ្សាស្រ្ទីប ដោយបាញ់ស្រោចរ៉ុកកែតរាប់ពាន់គ្រាប់ទៅលើទឹកដីអ៊ីស្រាអែល ខណៈបន្ទាប់មកសញ្ញា​ប្រកាសអាសន្ន​បាន​បន្លឺ​ឡើង​ជា​បន្តបន្ទាប់​​ក្នុង​តំបន់​ជា​ច្រើន​នៅ​ទូទាំង​ប្រទេសអ៊ីស្រាអែល រួម​មានទាំង​តំបន់ Tel Aviv និង​តំបន់​ជុំវិញ​នោះផងដែរ ។

មិនយូរប៉ុន្មាន កងកម្លាំងការពារជាតិអ៊ីស្រាអែល (IDF) បានប្រកាសថា ពួកគេកំពុងបើកប្រតិបត្តិការ ‘ដាវដែក’ ជាការសងសឹកចំពោះការវាយប្រហារពីសំណាក់ក្រុមហាម៉ាស់-ប៉ាឡេស្ទីន ។

យោងតាមរបាយការណ៍ចុងក្រោយបានឲ្យដឹងថា ការវាយប្រហារដោយគ្រាប់រ៉ុកកែតពីសំណាក់ក្រុមប្រដាប់អាវុធហាម៉ាស់ដែលមិនធ្លាប់មានពីមុនមក បានបង្កឲ្យប្រជាជនអ៊ីស្រាអែលយ៉ាងតិច ៧០០ នាក់ស្លាប់ និងជាង ២,០០០ នាក់រងរបួស ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ ការវាយប្រហាររបស់ក្រុមហាម៉ាស់ សម្លាប់ទាំងមេបញ្ជាការកងពលតូចរបស់ អ៊ីស្រាអែល