ក្រុមប្រឹក្សាសន្តិសុខ UN កោះប្រជុំបន្ទាន់លើជម្លោះ អ៊ីស្រាអែល-ប៉ាឡេស្ទីន តែមិនទទួលបានលទ្ធផលអ្វីឡើយ

ក្រុមប្រឹក្សាសន្តិសុខអង្គការសហប្រជាជាតិបានបើកកិច្ចប្រជុំបន្ទាន់មួយកាលពីថ្ងៃអាទិត្យ ដើម្បីពិភាក្សាអំពីការវាយប្រហាររបស់ក្រុមសកម្មប្រយុទ្ធប៉ាឡេស្ទីនហាម៉ាស់មកលើអ៊ីស្រាអែល ប៉ុន្តែទទួលបានលទ្ធផលតិចតួចប៉ុណ្ណោះ ។

ពាក់ព័ន្ធនឹងបញ្ហានេះដែរ ប្រភព​ការទូត​បាន​និយាយ​ថា អ្នក​ចូលរួមក្នុងកិច្ចប្រជុំបិទទ្វារនោះ​ភាគ​ច្រើន​បាន​សម្ដែង​ការ​រិះគន់ និង​ការ​ព្រួយ​បារម្ភ​ចំពោះ​ការ​វាយ​ប្រហារ​របស់​ក្រុម​ហាម៉ាស់មកលើប្រជា​ពលរដ្ឋ និង​បាន​ជំរុញ​ឲ្យ​មាន​ការ​បន្ធូរបន្ថយ​ស្ថានការណ៍តានតឹងនោះផងដែរ ។

ប៉ុន្តែទោះជាយ៉ាងណា សមាជិកក្រុមប្រឹក្សាសន្តិសុខអង្គការសហប្រជាជាតិត្រូវបានគេរាយការណ៍ថា បរាជ័យក្នុងការយល់ព្រមលើវិធានការជាក់លាក់ ហើយបានសម្រេចចិត្តបន្តការពិភាក្សា ។

ស្របពេលជាមួយគ្នានេះ លោកស្រី Lana Nusseibeh ឯកអគ្គរដ្ឋទូតអារ៉ាប់រួមប្រចាំនៅអង្គការសហប្រជាជាតិ បានប្រាប់អ្នកសារព័ត៌មានថា “កិច្ចប្រជុំនេះ ទទួលបានវឌ្ឍនភាពតិចតួចណាស់ ។ អ្វី​ដែល​សមាជិក​ក្រុម​ប្រឹក្សា​ត្រូវ​ឈានសម្រេចនៅពេល​នេះគឺ​ បទ​ឈប់​បាញ់ និង​ការ​បន្តចរចា​ឡើង​វិញ ប៉ុន្តែយើង​មិន​ទាន់​ស្ថិត​នៅ​ក្នុង​ដំណាក់កាលនេះ​នៅ​ឡើយ​ទេ” ។

ទន្ទឹមនោះ ឯកអគ្គរដ្ឋទូតរងរបស់សហរដ្ឋអាមេរិកប្រចាំនៅអង្គការសហប្រជាជាតិ លោក Robert Wood ក៏បានបញ្ជាក់យ៉ាងច្បាស់ផងដែរពីជំហររបស់រដ្ឋបាលលោក Biden ក្នុងការគាំទ្រប្រតិបត្តិការរបស់អ៊ីស្រាអែល ។ លោក​បាន​លើកឡើង​ថា អ្វី​ដែល​ត្រូវ​ផ្តោត​ការ​យក​ចិត្ត​ទុក​ដាក់​នៅ​ពេល​នេះ​គឺ “ការ​ថ្កោលទោស​ចំពោះ​ការ​វាយ​ប្រហារ​ភេរវកម្ម​ដ៏​ឃោរឃៅ​ទាំង​នេះ” ។

ចំណែកមុនពេលកិច្ចប្រជុំក្រុមប្រឹក្សានោះដែរ ឯកអគ្គរដ្ឋទូតចិនប្រចាំនៅអង្គការសហប្រជាជាតិ លោក Zhang Jun បាននិយាយអំពីតម្រូវការសម្រាប់បទឈប់បាញ់គ្នារបស់ភាគីទាំងពីរ ហើយអ្វីដែលសំខាន់ទៀតនោះ គឺការទប់ស្កាត់ការកើនឡើងនៃស្ថានការណ៍តានតឹង និងការស្លាប់បាត់បង់ជីវិតបន្ថែមទៀតរបស់ជនស៊ីវិល” ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ក្រុមហាម៉ាស់ ប្រាប់ពីចំនួនមនុស្សដែលចាប់ធ្វើជាចំណាប់ខ្មាំង (មានវីដេអូ)