ផ្កាយរណប Theos-2 របស់ថៃ បាញ់បង្ហោះ ចូលទៅទីអវកាស ដោយជោគជ័យ

ទីភ្នាក់ងារអភិវឌ្ឍន៍បច្ចេកវិទ្យាអវកាស និងព័ត៌មានវិទ្យា (GISTDA) និយាយថា ផ្កាយរណបគន្លងផែនដីទាបរបស់ប្រទេសថៃ ឈ្មោះ Theos-2 ត្រូវបានបាញ់បង្ហោះចេញពីមជ្ឈមណ្ឌលអវកាស Guiana ដោយជោគជ័យកាលពីម៉ោង ៨ និង ៣៦ ព្រឹកថ្ងៃចន្ទ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដើមឡើយ ផ្កាយរណបនេះ គ្រោងនឹងបាញ់បង្ហោះនៅថ្ងៃសៅរ៍ ទី៧ ខែតុលា ប៉ុន្តែត្រូវបានលុបចោលវិញត្រឹមតែ ១៤ វិនាទីប៉ុណ្ណោះ មុនពេលហោះឡើង ដោយសារបញ្ហាបច្ចេកទេស ។

ក្រុមហ៊ុនបារាំង Arianespace រាយការណ៍ថា ពួកគេបានរកឃើញបញ្ហាជាមួយនឹងរ៉ុកកែត Vega Flight VV23 ដែលជាបេសកកម្មដឹកផ្កាយរណបថៃ រួមជាមួយមនុស្ស ១០ នាក់ផ្សេងទៀតទៅកាន់លំហ ។

ផ្កាយរណបអង្កេតផែនដី Theos-2 ត្រូវបានបង្កើតឡើងដោយ GISTDA និងក្រុមហ៊ុន Airbus សម្រាប់ថតរូបភាពពីលំហ បន្តវេនពីបេសកកម្ម Theos-1 ដែលបាញ់បង្ហោះក្នុងឆ្នាំ២០០៨ ។

វានឹងចំណាយពេលមួយខែ ឬពីរខែទៀត ដើម្បីពិនិត្យមើលប្រព័ន្ធផ្សេងៗនៃផ្កាយរណប រួមទាំងសមត្ថភាពថតរូប មុនពេលដែលវាអាចចាប់ផ្តើមបេសកកម្មបាន។

GISTDA បន្ថែមថា Theos-2 អាចថតរូបភាពដែលមានកម្រិតច្បាស់ខ្ពស់ក្នុងទំហំរហូតដល់ ៥០សង់ទីម៉ែត្រ និងស្កេនផ្ទៃប្រហែល ៧៤០០០គីឡូម៉ែត្រការ៉េ ក្នុងមួយថ្ងៃ។

ជាចុងក្រោយទីភ្នាក់ងារនេះបញ្ជាក់ថា ព័ត៌មានភូមិសាស្ត្រដែលនឹងទទួលបានដោយផ្កាយរណបនេះ នឹងជួយប្រទេសថៃ រៀបចំផែនការអភិវឌ្ឍសេដ្ឋកិច្ច៕

ប្រែសម្រួល៖ Vann Vann

ប្រភព៖ Nation

ចុចអាន៖ កូរ៉េខាងត្បូងបាញ់បង្ហោះផ្កាយរណបទំនាក់ទំនងយោធាជាលើកដំបូងដោយជោគជ័យ