លោក ពូទីន បន្ទោសអាមេរិក ចំពោះសង្គ្រាម អ៊ីស្រាអែល-ប៉ាឡេស្ទីន

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយថា វិបត្តិនៅមជ្ឈិមបូព៌ា ដែលបង្កឡើងដោយការវាយលុកដ៏គួរឲ្យភ្ញាក់ផ្អើលកាលពីសប្តាហ៍មុន ដោយក្រុមសកម្មប្រយុទ្ធប៉ាឡេស្ទីន ហាម៉ាស់ ចូលទៅក្នុងភាគខាងត្បូងប្រទេសអ៊ីស្រាអែល គឺបង្ហាញឲ្យឃើញយ៉ាងច្បាស់ អំពីភាពអសមត្ថភាពរបស់ទីក្រុងវ៉ាស៊ីនតោន ក្នុងការដោះស្រាយជម្លោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងជំនួបជាមួយនាយករដ្ឋមន្ត្រីអ៊ីរ៉ាក់ Mohammed al-Sudani នៅទីក្រុងមូស្គូកាលពីថ្ងៃអង្គារទី១០ខែតុលា មេដឹកនាំរុស្ស៊ីពន្យល់ថា “ខ្ញុំជឿថា មនុស្សជាច្រើននឹងយល់ស្របជាមួយខ្ញុំថា នេះគឺជាឧទាហរណ៍ចំៗ អំពីការបរាជ័យនៃគោលនយោបាយមជ្ឈិមបូព៌ារបស់សហរដ្ឋអាមេរិក។ ពួកគេបានព្យាយាមរកដំណោះស្រាយសន្តិភាពផ្តាច់មុខតែឯង ប៉ុន្តែជាអកុសល អាមេរិកមិនបានយកចិត្តទុកដាក់ ក្នុងការស្វែងរកកិច្ចសម្របសម្រួលដែលអាចទទួលយកបានសម្រាប់ភាគីទាំងពីរនោះទេ”។

លោកពូទីនអះអាងថា សហរដ្ឋអាមេរិក មិនដែលគិតពីផលប្រយោជន៍ស្នូលរបស់ប្រជាជនប៉ាឡេស្ទីនឡើយ។ ផលប្រយោជន៍ទាំងនោះ គឺពាក់ព័ន្ធនឹងការបង្កើតរដ្ឋប្រជាជាតិប៉ាឡេស្ទីនឯករាជ្យ ដូចដែលបានលើកឡើងនៅក្នុងសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។

មុននេះ មន្ត្រីជាន់ខ្ពស់រុស្ស៊ីផ្សេងទៀត រួមទាំងរដ្ឋមន្ត្រីការបរទេស Sergey Lavrov ផងដែរ ធ្លាប់បានស្តីបន្ទោសសហរដ្ឋអាមេរិកចំពោះអរិភាពជាថ្មីនេះ។

អ្នកការទូតកំពូលរុស្ស៊ីបានលើកឡើងកាលពីថ្ងៃចន្ទថា ក្រុមអ្នកសម្រុះសម្រួលមជ្ឈិមបូព៌ា រួមមានសហរដ្ឋអាមេរិក រុស្ស៊ី សហភាពអឺរ៉ុប និងអង្គការសហប្រជាជាតិ គួរតែដើរតួនាទីនាំមុខក្នុងកិច្ចចរចាសន្តិភាព។ ប៉ុន្តែសហរដ្ឋអាមេរិក បានបោះបង់ចោលយន្តការនេះ ដើម្បីធ្វើការដោយផ្តាច់មុខសម្រាប់ផលប្រយោជន៍ផ្ទាល់ខ្លួនឯង៕

ប្រែសម្រួល៖ Vann Vann

ប្រភព៖ RT

ចុចអាន៖ ឥស្សរជនក្រុមហាម៉ាស់២នាក់ ត្រូវអ៊ីស្រាអែលសម្លាប់ ក្នុងនោះមានម្នាក់ ជារដ្ឋមន្ត្រីសេដ្ឋកិច្ច