លោក Netanyahu និងបក្សប្រឆាំងអ៊ីស្រាអែល ងាកមករួមដៃគ្នាកម្ចាត់សត្រូវ ក្នុងគ្រាប្រទេសមានសង្គ្រាម

កាលពីថ្ងៃពុធទី១១ខែតុលា នាយករដ្ឋមន្ត្រីអ៊ីស្រាអែលលោក Benjamin Netanyahu និងថ្នាក់ដឹកនាំគណបក្សប្រឆាំងលោក Benny Gantz បានព្រមព្រៀង ទុកជម្លោះនយោបាយនៅមួយឡែកសិន ដោយងាកមករួមដៃគ្នាដើម្បីកម្ចាត់សត្រូវវិញ។

គណបក្សទាំងពីរបានយល់ព្រមបង្កើតរដ្ឋាភិបាលរួបរួមបន្ទាន់មួយ ស្របពេលប្រទេសកំពុងប្រឈមការវាយប្រហារ ពីសំណាក់ក្រុមហាម៉ាស់ ប៉ាឡេស្ទីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Gantz បានប្រាប់ពលរដ្ឋអ៊ីស្រាអែលថា រដ្ឋាភិបាលដែលទើបបង្កើតថ្មីនេះគឺ “រួបរួម” និងត្រៀមខ្លួនរួចជាស្រេចដើម្បីកម្ចាត់ក្រុមហាម៉ាស់ឲ្យអស់ពីផែនដី។

ក្រៅពីលោក Netanyahu និង Gantz, គណៈរដ្ឋមន្ត្រីបណ្តោះអាសន្នថ្មីនេះ ក៏នឹងរួមបញ្ចូលរដ្ឋមន្ត្រីការពារជាតិ Yoav Gallant ផងដែរ។

សេចក្តីថ្លែងការណ៍មួយនិយាយថា “ក្នុងអំឡុងពេលសង្រ្គាម គ្មានសេចក្តីព្រាងច្បាប់ ឬសេចក្តីសម្រេចរបស់រដ្ឋាភិបាលណាមួយនឹងត្រូវបានផ្សព្វផ្សាយចេញទេ។ ការតែងតាំងមន្ត្រីជាន់ខ្ពស់ទាំងអស់ នឹងត្រូវបានពង្រីកដោយស្វ័យប្រវត្តិក្នុងអំឡុងពេលសង្រ្គាម”។

រដ្ឋាភិបាល​គ្រាអាសន្ន​នេះ នឹង​ផ្តល់​ការ​ឯកភាព​ជាតិ​ទូលំទូលាយ​ចំពោះ​សកម្មភាព​យោធា។ រដ្ឋាភិបាលនេះ ក៏ប្រមែប្រមូលមេទ័ពទាំងអស់មករួមគ្នា ដើម្បីរៀបចំយុទ្ធសាស្រ្តកម្ចាត់សត្រូវផងដែរ។

ការប្រកាសនេះធ្វើឡើង ចំពេលអ៊ីស្រាអែល បង្កើនការវាយប្រហារលើតំបន់ហ្គាហ្សា បន្ទាប់ពីការវាយលុកដែលមិនធ្លាប់មានពីមុនមកលើទឹកដីអ៊ីស្រាអែលភាគខាងត្បូងដោយក្រុមប្រដាប់អាវុធប៉ាឡេស្ទីន ហាម៉ាស់ បានសម្លាប់ជនជាតិអ៊ីស្រាអែលយ៉ាងតិច១២០០នាក់ ភាគច្រើនជាជនស៊ីវិល៕

ប្រែសម្រួល៖ Vann Vann

ប្រភព៖ Aljazeera, BBC

ចុចអាន៖ ក្រុមហាម៉ាស់ ដោះលែងចំណាប់ខ្មាំង ជាម្តាយកូនចំនួន ៣នាក់