លោក ពូទីន ថា រុស្ស៊ី តែងតែគាំទ្រការបង្កើតរដ្ឋឯករាជ្យ ប៉ាឡេស្ទីន

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយនៅក្នុងកិច្ចប្រជុំពេញអង្គនៃវេទិកាថាមពលរុស្ស៊ីថា ប្រទេសរុស្ស៊ីតែងតែគាំទ្រការអនុវត្តសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិស្តីពីការបង្កើតរដ្ឋឯករាជ្យប៉ាឡេស្ទីន ។

លោក ពូទីន បានចង្អុលបង្ហាញថា “ជំហររបស់រុស្ស៊ីលើការដោះស្រាយជម្លោះ ប៉ាឡេស្ទីន-អ៊ីស្រាអែល មិនមែនបង្កឲ្យមានព្រឹត្តិការណ៍សោកនាដកម្មដូចនាពេលថ្មីៗនេះនោះទេ ហើយជំហរនេះខាងភាគីអ៊ីស្រាអែល និងមិត្តភ័ក្រ្តរបស់យើងនៅប៉ាឡេស្ទីន ពិតជាយល់យ៉ាងច្បាស់ហើយ” ។

លោកប្រធានាធិបតីបានកត់សម្គាល់ថា បញ្ហាប៉ាឡេស្ទីន-អ៊ីស្រាអែល កំពុងកាន់តែធ្ងន់ធ្ងរឡើងៗក្នុងប៉ុន្មានឆ្នាំថ្មីៗនេះ ដោយសារតែសកម្មភាពមិនចេះសម្របសម្រួលរបស់ប្រទេសមួយចំនួន ជាពិសេសមានឥស្សរជននយោបាយ និងអ្នកជំនាញក្នុងប្រទេសទាំងនោះ នៅតែជឿជាក់ថា វាមិនចាំបាច់នោះទេក្នុងការបង្កើតរដ្ឋឯករាជ្យនោះ ។

លោក ពូទីន បានបញ្ជាក់ថា “បច្ចុប្បន្នមានមនុស្សប្រភេទនេះនៅក្នុងប្រទេសអ៊ីស្រាអែល ។ ក្នុងរយៈពេលជាច្រើនទសវត្សរ៍មកនេះ ពួកគេតែងតែព្យាយាមដោះស្រាយបញ្ហានេះដោយកម្លាំងយោធាដែលមានក្នុងដៃ ហើយជាអកុសលវានាំឲ្យមានព្រឹត្តិការណ៍សោកនាដកម្មដូចដែលយើងកំពុងធ្វើជាសាក្សី និងឃើញជាក់ស្ដែងនៅពេលនេះស្រាប់” ។

គួរបញ្ជាក់ថា រហូតមកដល់ពេលនេះការវាយប្រហារគ្នាទៅវិញទៅមករវាងក្រុមប៉ាឡេស្ទីនហាម៉ាស់ និងអ៊ីស្រាអែលដែលផ្ទុះឡើងនៅព្រឹកព្រលឹមថ្ងៃសៅរ៍ ទី៧ ខែតុលា បានសម្លាប់មនុស្សដល់ ៣,០០០ នាក់ ហើយក្នុងចំណោមអ្នកស្លាប់ទាំងនោះ ក៏មានពលរដ្ឋរុស្ស៊ីចំនួន ៤ នាក់ផងដែរ ខណៈជនបរទេសរាប់សិបនាក់ត្រូវបានសម្លាប់ រងរបួស ឬចាប់ជាចំណាប់ខ្មាំង ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ លោក ពូទីន ឲ្យភាគីជម្លោះ អ៊ីស្រាអែល-ប៉ាឡេស្ទីន ធ្វើយ៉ាងណាបន្ថយ​ផលប៉ះពាល់ដល់ជនស៊ីវិលមកនៅត្រឹមសូន្យ