តួកគី ថា ជម្លោះចុងក្រោយនៅមជ្ឈិមបូព៌ា “មិនមែនជាសង្គ្រាម” នោះទេ

ប្រធានាធិបតីប្រទេសតួកគីលោក Recep Tayyip Erdogan បាននិយាយកាលពីថ្ងៃពុធ ទី១១ ខែតុលាថា អ្វីដែលកំពុងកើតឡើងនៅមជ្ឈិមបូព៌ាមិនមានជាសង្គ្រោះនោះទេ វាគឺជាការសម្លាប់រង្គាល ។

លោក Erdogan បាននិយាយនៅក្នុងសុន្ទរកថាទៅកាន់សមាជិកសភាតួកទីថា “ការប្រើកម្លាំងមិនត្រូវតាមក្បួនខ្នាត និងមិនមានសីលធម៌ប្រឆាំងនឹងតំបន់ហ្គាហ្សាស្ទ្រីប អាចធ្វើឲ្យអ៊ីស្រាអែលក្លាយជាកន្លែងមួយនៅលើពិភពលោកដែលគ្មានអ្នកចង់រស់នៅឡើយ ដោយសារតែជម្លោះមួយនេះ គឺជាការប្រយុទ្ធដោយប្រើកលល្បិចដ៏ថោកទាប ហើយមិនមែនជាសង្រ្គាមនោះទេ ប៉ុន្តែជាការសម្លាប់រង្គាល” ។

ទន្ទឹមនោះ មេដឹកនាំ​តួ​ក​គី​រូបនេះក៏បានថ្កោលទោសដល់ទង្វើដ៏ខុសឆ្គងចំពោះជនស៊ីវិលផងដែរ ជាពិសេសលោកអំពាវនាវដល់ភាគីជម្លោះទាំងពីរឲ្យគិតដល់ក្រមសីលធម៌នៅក្នុងច្បាប់សង្គ្រាមផង ប៉ុន្តែជាអកុសល គំនិតនេះកំពុងត្រូវបានរំលោភបំពានយ៉ាងធ្ងន់ធ្ងរនៅក្នុងជម្លោះនៅអ៊ីស្រាអែល និងហ្គាហ្សា” ។

លោក Erdogan បានចោទប្រកាន់អង្គការសហប្រជាជាតិ និងអង្គការដទៃទៀតថា ទុកប្រជាជនប៉ាឡេស្ទីនចោល មិនបានធ្វើតាមការសន្យារបស់ពួកគេ និងមិនបានការពារសិទ្ធិស្របច្បាប់របស់ប៉ាឡេស្ទីន ហើយការវាយប្រហារនៅតំបន់ហ្គាហ្សាស្ទ្រីប ការទម្លាក់គ្រាប់បែកលើការតាំងទីលំនៅរបស់ជនស៊ីវិល និងការហាមឃាត់មិនឲ្យចូលទៅដល់រថយន្តដឹងទំនិញមនុស្សធម៌ គឺជាអ្វីដែលក្រុមសកម្មប្រយុទ្ធធ្វើ មិនមែនប្រទេសនានាជាអ្នកធ្វើនោះទេ” ។

មិនតែប៉ុណ្ណោះ លោក Erdogan ថែមទាំងបានអំពាវនាវទៅដល់មេដឹកនាំផ្សេងទៀតឲ្យដើរតួនាទីក្នុងការដោះស្រាយវិបត្តិ នាំភាគីទាំងពីរអង្គុយនៅតុចរចា និងសម្រេចបញ្ចប់ការបង្ហូរឈាមក្នុងភាពតានតឹងដែលបានផ្ទុះឡើងកាលពីពេលថ្មីៗនេះនៅមជ្ឈិមបូព៌ា ។

យោងតាមទិន្នន័យផ្លូវការចុងក្រោយពីការវាយប្រហាររបស់ក្រុមសកម្មប្រយុទ្ធហាម៉ាស់មកលើទឹកដីអ៊ីស្រាអែលបានឲ្យដឹងថា ប្រជាជនប៉ាឡេស្ទីនជាង ១,០០០ នាក់ត្រូវបានសម្លាប់ ហើយជាង ៥,១០០ នាក់ផ្សេងទៀតបានរងរបួស ខណៈនៅខាងអ៊ីស្រាអែលវិញ មនុស្ស​ជាង ១,២០០ ​នាក់​បាន​បាត់បង់​ជីវិត និង​ជាង ២.៩០០​នាក់​បាន​រង​របួស ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ លោក ពូទីន ថា រុស្ស៊ី តែងតែគាំទ្រការបង្កើតរដ្ឋឯករាជ្យ ប៉ាឡេស្ទីន