តៃវ៉ាន់ បង្កើតកងកម្លាំងពិសេស​សិក្សាសង្រ្គាម អ៊ីស្រាអែល-ប៉ាឡេស្ទីន

រដ្ឋមន្ត្រីក្រសួងការពារជាតិ លោក Chiu Kuo-cheng បាននិយាយនៅថ្ងៃព្រហស្បតិ៍ ទី១២ ខែតុលា ថា តៃវ៉ាន់បានបង្កើតកងកម្លាំងពិសេសមួយ ដើម្បីទាញមេរៀនពីការវាយប្រហារដ៏គួរឱ្យភ្ញាក់រន្ធត់ដោយក្រុមហាម៉ាស់លើប្រទេសអ៊ីស្រាអែល។

លោក Chiu ប្រាប់អ្នកសារព័ត៌មានថា ក្រសួងបានបង្កើតក្រុមការងារមួយដើម្បីតាមដានស្ថានការណ៍ជម្លោះរបស់អ៊ីស្រាអែលជាមួយក្រុមសកម្មប្រយុទ្ធហាម៉ាស់របស់ប្រទេសប៉ាឡេស្ទីន ដើម្បីទាញយកមេរៀនមកប្រៀបធៀបទៅនឹងជម្លោះរវាងកោះតៃវ៉ាន់-ចិន។

រដ្ឋមន្ត្រីរូបនេះ និយាយថា “មេរៀនដំបូងដែលតៃវ៉ាន់បានរៀនគឺ ការងារស៊ើបការណ៍មានសារៈសំខាន់ណាស់។ វិធានការណ៍តបតដ៏វៃឆ្លាតជាច្រើនអាចត្រូវបានបង្កើតឡើង ដើម្បីចៀសវាងសង្គ្រាម” ។

ជាមួយគ្នានោះរដ្ឋាភិបាលតៃវ៉ាន់បានថ្កោលទោសការវាយប្រហាររបស់ក្រុមហាម៉ាស់ ដោយប្រធានាធិបតី Tsai Ing-wen ថ្លៃងថា “តៃវ៉ាន់នៅតែប្តេជ្ញាធ្វើការជាមួយប្រទេសដែលមានគំនិតដូចគ្នា ដើម្បីប្រយុទ្ធប្រឆាំងនឹងការគំរាមកំហែង អំពើហិង្សា ដើម្បីការពារសេរីភាព និងលទ្ធិប្រជាធិបតេយ្យ” ៕

ប្រែស​ម្រួល៖ សន្យា

ប្រភព៖ Reuters

ចុចអាន៖ តួកគី ថា ជម្លោះចុងក្រោយនៅមជ្ឈិមបូព៌ា “មិនមែនជាសង្គ្រាម” នោះទេ