ក្រុមហាម៉ាស់ អង្វរករ សុំជំនួយ ជួយប្រជាពលរដ្ឋនៅ ហ្គាហ្សា

កាលពីថ្ងៃព្រហស្បតិ៍ទី១២ខែតុលា ក្រុមហាម៉ាស់ បានអំពាវនាវដល់អង្គការជំនួយពិភពលោកឲ្យផ្តល់ជំនួយផ្នែកវេជ្ជសាស្រ្ត និងជំនួយសង្គ្រោះសំខាន់ៗដល់តំបន់ហ្គាហ្សា ខណៈអ៊ីស្រាអែល បន្តការវាយប្រហារតាមអាកាស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិបត្តិមនុស្សធម៌នៅតំបន់ហ្គាហ្សា កាន់តែយ៉ាប់យ៉ឺនទៅៗ ខណៈមានការព្រមានថា ប្រជាជនមានហានិភ័យនៃភាពអត់ឃ្លាន ហើយប្រេងឥន្ធនៈ អាចអស់ក្នុងរយៈពេលប៉ុន្មានម៉ោងទៀតប៉ុណ្ណោះ។

ការព្រមាននេះកើតឡើង ក្រោយពេលអ៊ីស្រាអែល បិទខ្ទប់​ការផ្គត់ផ្គង់​សំខាន់ៗ​ពី​តំបន់​ជុំវិញ ​ជា​ការ​ឆ្លើយតបទៅ​នឹង​ការ​វាយ​ប្រហារ​ដ៏​ឃោរឃៅ​របស់​ក្រុម​ហាម៉ាស់។

ក្រុមហាម៉ាស់ បាននិយាយក្នុងសេចក្តីថ្លែងការណ៍មួយថា “យើងសូមអំពាវនាវដល់ស្ថាប័នផ្តល់ជំនួយ សុខភាព និងសប្បុរសធម៌ទាំងអស់នៅក្នុងពិភពអារ៉ាប់ និងឥស្លាមរបស់យើង ក៏ដូចជាក្នុងសហគមន៍អន្តរជាតិ ឲ្យធ្វើអន្តរាគមន៍ជាបន្ទាន់ និងឆាប់រហ័ស ដើម្បីនាំយកនូវគ្រឿងឧបភោគ បរិក្ខារពេទ្យ និងជំនួយ ព្រមទាំងប្រេងឥន្ធនៈចាំបាច់ទាំងអស់ ដើម្បីជួយសង្គ្រោះពលរដ្ឋប៉ាឡេស្ទីនជាងពីរលាននាក់”។

ស្របពេលជាមួយគ្នានោះ រដ្ឋមន្ត្រីក្រសួងសុខាភិបាលប៉ាឡេស្ទីន លោកវេជ្ជបណ្ឌិត Mai Alkaila បានព្រមានអំពីការដួលរលំនៃប្រព័ន្ធថែទាំសុខភាពនៅតំបន់ហ្គាហ្សាស្ទ្រីប ដែលជាលទ្ធផលនៃកង្វះខាតការផ្គត់ផ្គង់វេជ្ជសាស្ត្រធ្ងន់ធ្ងរ។

មនុស្សយ៉ាងតិច១៥៣៧នាក់ រួមទាំងកុមារ៥០០នាក់ និងស្ត្រី២៦៧នាក់ផងដែរ ត្រូវបានសម្លាប់ ចាប់តាំងពីអ៊ីស្រាអែលបើកការវាយប្រហារលើតំបន់ហ្គាហ្សា បន្ទាប់ពីការវាយប្រហាររបស់ក្រុមហាម៉ាស កាលពីថ្ងៃសៅរ៍សប្តាហ៍មុន។ មនុស្ស​៦៦១២​នាក់ ក៏​រង​របួសផងដែរ៕

ប្រែសម្រួល៖ Vann Vann

ប្រភព៖ CNN

ចុចអាន៖ ស្ថានភាពប្រជាជន ប៉ាឡេស្ទីន កាន់តែយ៉ាប់យ៉ឺន ខណៈអ៊ីស្រាអែល រៀបចំការវាយលុកជើងគោក