អាមេរិក បញ្ជូននាវាផ្ទុកយន្តហោះទីពីរទៅសមុទ្រមេឌីទែរ៉ាណេភាគខាងកើត ដើម្បីរាំងខ្ទប់សកម្មភាព អ៊ីរ៉ង់

រដ្ឋមន្ត្រីការពារជាតិអាមេរិក លោក Lloyd Austin បាននិយាយកាលពីថ្ងៃសៅរ៍ថា សហរដ្ឋអាមេរិកកំពុងបញ្ជូនក្រុមនាវាផ្ទុកយន្តហោះទី ២ ទៅកាន់សមុទ្រមេឌីទែរ៉ាណេភាគខាងកើត ដើម្បីរារាំងសកម្មភាពអរិភាពប្រឆាំងនឹងអ៊ីស្រាអែល ឬកិច្ចខិតខំប្រឹងប្រែងណាមួយឆ្ពោះទៅរកការពង្រីកសង្រ្គាមមួយនេះ បន្ទាប់ពីការវាយប្រហាររបស់ពួកហាម៉ាស់ ។

នាវា USS Eisenhower និងនាវាចម្បាំង នឹងចូលរួមជាមួយក្រុមនាវាផ្ទុកយន្តហោះផ្សេងទៀតដូចជានាវា USS Ford ដែលបានដាក់ពង្រាយទៅកាន់តំបន់នោះរួចទៅហើយ បន្ទាប់ពីមានការវាយលុកយ៉ាងឃោរឃៅរបស់ក្រុមហាម៉ាសកាលពីសប្តាហ៍មុន ខណៈការបញ្ជូនក្រុមនាវានេះក៏ដើម្បីជាការឆ្លើយតបរបស់អ៊ីស្រាអែលនៅហ្គាហ្សាផងដែរ ។

លោក Austin បាននិយាយនៅក្នុងសេចក្តីថ្លែងការណ៍មួយ ដោយសំដៅទៅលើអ៊ីរ៉ង់ និងក្រុមសកម្មប្រយុទ្ធហេសបូឡារបស់ប្រទេសលីបង់ថា ការដាក់ពង្រាយនាវានេះបង្ហាញពីការប្តេជ្ញាចិត្តរបស់ទីក្រុងវ៉ាស៊ីនតោនចំពោះសន្តិសុខរបស់អ៊ីស្រាអែល និងជាការប្តេជ្ញាចិត្តក្នុងការរារាំងរដ្ឋណាមួយដែលស្វែងរកការកើនឡើងនៃសង្រ្គាមនេះ ។

គួរបញ្ជាក់ថា ការបញ្ជូននាវាផ្ទុកយន្តហោះនេះកើតមានឡើង បន្ទាប់ពីក្រុមហាម៉ាស់បើកការវាយប្រហារមិនធ្លាប់មានពីមុនមកកាលពីថ្ងៃសៅរ៍សប្ដាហ៍មុនទៅលើអីស្រាអែល ដោយបានសម្លាប់មនុស្សជាង ១,៣០០ នាក់ ដែលភាគច្រើនជាជនស៊ីវិល ។

ចំណែកនៅតំបន់ហ្គាហ្សាវិញ ក្រសួងសុខាភិបាលដែលគ្រប់គ្រងដោយក្រុមហាម៉ាសបាននិយាយថា ការឆ្លើយតបរបស់អ៊ីស្រាអែលបានសម្លាប់មនុស្សជាង ២,២០០ នាក់ ហើយក្នុងនោះមានក្រុមសកម្មប្រយុទ្ធហាម៉ាស់ប្រហែល ១,៥០០ នាក់នៅក្នុងទឹកដីអ៊ីស្រាអែល ៕

ប្រែសម្រួលដោយ ៖ ជីវ័ន្ត

ប្រភព ៖ The Times of Israel

ចុចអាន ៖ អ៊ីរ៉ង់ ព្រមាន អ៊ីស្រាអែល ឲ្យបញ្ឈប់ការវាយប្រហារនៅតំបន់ហ្គាហ្សា បើមិនដូច្នេះទេអាចជួបទុក្ខធំ