អ៊ីស្រាអែល ថា គ្មានផ្លូវចរចាជាមួយក្រុមហាម៉ាស់ដើម្បីរំដោះចំណាប់ខ្មាំង​ឡើយ

ប្រធានក្រុមប្រឹក្សាសន្តិសុខជាតិអ៊ីស្រាអែលលោក Tzachi Hanegbi បាននិយាយកាលពីថ្ងៃអាទិត្យថា មិនមានកិច្ចខិតខំប្រឹងប្រែងចរចាសកម្មណាមួយកំពុងធ្វើឡើងដើម្បីរំដោះជនជាតិអ៊ីស្រាអែល និងជនបរទេសមួយចំនួនទៀតដែលត្រូវបានចាប់ជាចំណាប់ខ្មាំងដោយក្រុមហាម៉ាស់នៅឡើយទេ ។

លោក Hanegbi បានថ្លែង​ប្រាប់​អ្នក​យក​ព័ត៌មាន​នៅ​ទីស្នាក់ការ​កណ្តាលរបស់​កងកម្លាំង​ការពារជាតិ​អ៊ីស្រាអែលក្នុងទីក្រុង Tel Aviv ថា “យើងគ្មានផ្លូវចរចាជាមួយក្រុមប្រដាប់អាវុធប៉ាឡេស្ទីនហាម៉ាស់ឡើយ ជាពិសេសអ៊ីស្រាអែលនឹងមិនចរចាជាមួយសត្រូវដែលយើងធ្លាប់បានប្ដេជ្ញាកម្ចាត់ចោលចេញពីផែនដីរបស់យើងដាច់ខាត” ។

ទន្ទឹមនោះ ការអត្ថាធិប្បាយរបស់ប្រធានក្រុមប្រឹក្សាសន្តិសុខជាតិរូបនេះ ក៏បានជំរុញឲ្យមានការខឹងសម្បារយ៉ាងខ្លាំងពីសំណាក់ក្រុមគ្រួសារនៃអ្នកបាត់ខ្លួនផងដែរ ហើយពួកគេថែមទាំងបានចោទប្រកាន់រដ្ឋាភិបាលទៀតថា មិនបានអើពើជនរងគ្រោះទាំងនោះឡើយ ។

ពាក់ព័ន្ធនឹងបញ្ហានេះដែរ ក្រុមប្រដាប់អាវុធហាម៉ាស់ធ្លាប់បានលើកឡើងហើយថា ការចរចាដោះដូរឈ្លើយសឹកណាមួយជាមួយរដ្ឋាភិបាលអ៊ីស្រាអែលនឹងកើតមានឡើង លុះត្រាតែការប្រយុទ្ធគ្នាចប់សប់គ្រប់សិន ខណៈរហូតមកដល់ពេលនេះគេ​គិត​ថា ​ក្រុមហាម៉ាស់បានចាប់​ចំណាប់ខ្មាំង​ចន្លោះពី ១៥០ ទៅ ២០០ នាក់ ។

ស្របពេលជាមួយគ្នានេះ ការអះអាងរបស់លោក Hanegbi ក៏កើតមានឡើង បន្ទាប់ពីក្រុមហាម៉ាស់បើកការវាយប្រហារមិនធ្លាប់មានពីមុនមកទៅលើអ៊ីស្រាអែលកាលពីថ្ងៃទី៧ ខែតុលា ដោយបានសម្លាប់មនុស្សជាង ១,៣០០ នាក់ ដែលភាគច្រើនជាជនស៊ីវិល ។

ចំណែកនៅតំបន់ហ្គាហ្សាវិញ ក្រសួងសុខាភិបាលដែលគ្រប់គ្រងដោយក្រុមហាម៉ាស់បាននិយាយថា ការឆ្លើយតបរបស់អ៊ីស្រាអែលបានសម្លាប់មនុស្សជាង ២,៦០០ នាក់ ហើយក្នុងនោះមានក្រុមសកម្មប្រយុទ្ធហាម៉ាស់ប្រហែល ១,៥០០ នាក់នៅក្នុងទឹកដីអ៊ីស្រាអែល ខណៈមនុស្ស​ជាង ៩,៦០០ នាក់បាន​រង​របួស ៕

ប្រែសម្រួលដោយ ៖ ជីវ័ន្ត

ប្រភព ៖ The Times of Israel

ចុចអាន ៖ អតីតមេទ័ពកំពូល អ៊ីរ៉ង់ ថា ទីក្រុងតេហេរ៉ង់ជួយក្រុមហាម៉ាស់ទាំងតិចនិក និងផ្នែកហិរញ្ញវត្ថុ