ប្រធានាធិបតីប៉ាឡេស្ទីន រិះគន់ក្រុមហាម៉ាស់ ជុំវិញការវាយប្រហារទៅលើអ៊ីស្រាអែល

ទីភ្នាក់ងារព័ត៌មានផ្លូវការរបស់អាជ្ញាធរប៉ាឡេស្ទីន កាលពីថ្ងៃទី១៥ ខែតុលា បានចេញផ្សាយការអត្ថាធិប្បាយមួយ ដោយដកស្រសង់សម្ដីប្រធានាធិបតី Mahmoud Abbas ដែលបានរិះគន់ក្រុម Hamas ជុំវិញសកម្មភាពរបស់ក្រុមនេះទៅលើប្រទេសអ៊ីស្រាអែល។

ការអត្ថាធិប្បាយដែលចុះផ្សាយដោយគេហទំព័រ Wafa បានកើតឡើងក្នុងអំឡុងពេលសន្ទនាតាមទូរសព្ទរវាងលោកប្រធានាធិបតី Abbas និងប្រធានាធិបតីវេណេស៊ុយអេឡាលោក Nicolas Maduro ។ អ្នកទាំងពីរបានពិភាក្សាគ្នាអំពីការទម្លាក់គ្រាប់បែករបស់អ៊ីស្រាអែលទៅលើតំបន់ហ្គាហ្សា បន្ទាប់ពីការវាយលុកដ៏សាហាវរបស់ពួកហាម៉ាស់ឆ្លងកាត់ទីក្រុងនានារបស់អ៊ីស្រាអែល។

របាយការណ៍ដើមរបស់ Wafa ស្តីពីការអំពាវនាវរបស់លោក Abbas បានសរសេរថា ប្រធានាធិបតី Abbas មិនគាំទ្រគោលនយោបាយ និងសកម្មភាពរបស់ក្រុមហាម៉ាស់ចំពោះអ៊ីស្រាអែលឡើយ ហើយទង្វើរបស់ក្រុមនេះមិនតំណាងឱ្យប្រជាជនប៉ាឡេស្ទីននោះទេ។ ចំណែកគោលនយោបាយ កម្មវិធី និងការសម្រេចចិត្តរបស់អង្គការរំដោះប៉ាឡេស្ទីន​ (PLO) ទើបស្របច្បាប់ និងតំណាងឱ្យប្រជាជនប៉ាឡេស្ទីនពិតប្រាកដ។

យ៉ាងណាមិញ ប៉ុន្មានម៉ោងក្រោយមក សេចក្ដីថ្លែការណ៍របស់ប្រធានាធិបតីបានកែតម្រូវ ដោយលុបចោលការរិះគន់ក្រុមហាម៉ាស់វិញ។ ពេលនេះ​មិន​ទាន់​ដឹង​ច្បាស់​ថា​ហេតុអ្វី​បាន​ជាសេចក្ដីថ្លែងការណ៍របស់ប្រធានាធិបតីត្រូវកែវិញឡើយ ​ហើយពុំមានការអត្ថាធិប្បាយឆ្លើយតបពីការិយាល័យរបស់លោក Abbas ឬដោយគេហទំព៍រ Wafa  ឬក្រុម Hamas នោះទេ៕

ប្រែសម្រួល៖ សន្យា

ប្រភព៖ Reuters

ចុចអាន៖ ចិន ថ្កោលទោស អ៊ីស្រាអែល ថា សកម្មភាពការពារខ្លួនប្រឆាំងក្រុមហាម៉ាស់ គឺលើសពេកហើយ