អ៊ីស្រាអែល មិនបញ្ចប់សង្គ្រាមដាច់ខាត លុះត្រាកម្ចាត់អស់ ក្រុម​ហាម៉ាស់

កាលពីថ្ងៃចន្ទទី១៦ខែតុលា រដ្ឋមន្ត្រីចារកម្មអ៊ីស្រាអែលលោកស្រី Gila Gamliel បាននិយាយថា រដ្ឋាភិបាលទីក្រុងហ្ស៊េរុយសាឡិមនឹងមិនបញ្ចប់សង្គ្រាមនោះទេ រហូតដល់ក្រុមហាម៉ាស់ ត្រូវបានកម្ចាត់ចេញអស់ពីតំបន់ហ្គាហ្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងទៅកាន់កម្មវិធី Newshour របស់ BBC World Service លោកស្រីនិយាយថា ជំហានដំបូងនៃការធ្វើអន្តរាគមន៍របស់អ៊ីស្រាអែលនៅក្នុងក្របខ័ណ្ឌប៉ាឡេស្ទីន គឺត្រូវស្តារសន្តិសុខរបស់ អ៊ីស្រាអែលឡើងវិញ។

ស្របពេលជាមួយគ្នានោះដែរ លោកស្រី Gamliel ទទួលស្គាល់ថា រដ្ឋាភិបាលបានបរាជ័យដើម្បីការពារប្រជាពលរដ្ឋរបស់ខ្លួន អំឡុងការវាយប្រហារថ្ងៃទី៧ខែតុលា ប៉ុន្តែអ៊ីស្រាអែលនឹងត្រូវដោះស្រាយបន្ទាប់ពីសង្រ្គាម ហើយនឹងមានការសុំទោសដល់ជនរងគ្រោះនៅពេលក្រោយ។

កន្លងមក ប្រធានាធិបតីអាមេរិក លោក ចូ បៃដិន ក៏បានប្រកាសក្តែងៗផងដែរថា ក្រុមហាម៉ាស់ ត្រូវតែកម្ចាត់ចោលទាំងស្រុង ហើយត្រូវតែមានផ្លូវឆ្ពោះទៅកាន់រដ្ឋប៉ាឡេស្ទីន។

នៅក្នុងបទសម្ភាសន៍ជាមួយកម្មវិធី 60 Minutes របស់ទូរទស្សន៍ CBS លោក បៃដិន ថែមទាំងព្រមានអ៊ីរ៉ង់ និងក្រុមហេសបូឡាទៀតផងថា កុំលូកដៃ និងធ្វើឲ្យជម្លោះកាន់តែរីកធំឲ្យសោះ ហើយលោកថែមទាំងបានប្តេជ្ញាទៀតថា នឹងធ្វើគ្រប់យ៉ាង ដើម្បីស្វែងរកចំណាប់ខ្មាំងអាមេរិកដែលនៅមានជីវិត ហើយរំដោះពួកគេ៕

ប្រែសម្រួល៖ Vann Vann

ប្រភព៖ BBC

ចុចអាន៖ អាមេរិក ធានា អាចរ៉ាប់រងជួយសម្ព័ន្ធមិត្តបាន ទោះសង្គ្រាម២ កំពុងផ្ទុះឡើងក្នុងពេលតែមួយ