អ៊ីស្រាអែល សុំ អាមេរិក ១០ ពាន់លានដុល្លារសម្រាប់ជំនួយយោធា

យោងតាមការចុះផ្សាយរបស់កាសែត New York Times បានឲ្យដឹងថា ប្រទេសអ៊ីស្រាអែលបានស្នើសុំសហរដ្ឋអាមេរិកនូវជំនួយយោធាបន្ទាន់ក្នុងទំហំទឹកប្រាក់ចំនួន ១០ ពាន់លានដុល្លារ ដើម្បីប្រើសម្រាប់ការវាយបកទៅកាន់ក្រុមប្រដាប់អាវុធប៉ាឡេស្ទីនហាម៉ាស់ ។

ពាក់ព័ន្ធនឹងបញ្ហានេះដែរ ប្រធានព្រឹទ្ធសភាអាមេរិកលោក Chuck Schumer បាននិយាយក្នុងអំឡុងដំណើរទស្សនកិច្ចទៅកាន់ទីក្រុង Tel Aviv កាលពីថ្ងៃអាទិត្យថា សមាជិកសភាអាមេរិកក៏បានពិភាក្សាអំពីការផ្តល់ជំនួយនេះផងដែរ ដោយក្នុងនោះរួមមានគ្រាប់រំសេវសម្រាប់ប្រព័ន្ធខែលការពារមីស៊ីល Iron Dome, គ្រាប់បែកទម្លាក់ពីលើអាកាស JDAM ក៏ដូចជាគ្រាប់កាំភ្លើងទំហំ ១៥៥ មិល្លីម៉ែត្រជាដើម ។

ទន្ទឹមនោះ កាសែត New York Times បានរាយការណ៍ទៀតថា កញ្ចប់ជំនួយបច្ចុប្បន្នត្រូវបានដាក់ទៅកាន់សភារួចហើយដើម្បីឲ្យសភាធ្វើការត្រួតពិនិត្យ និងសម្របសម្រួលជាមួយសេតវិមាន ហើយកញ្ចប់ជំនួយនេះក៏នឹងរួមបញ្ចូលផងដែរនូវមូលនិធិសម្រាប់អ៊ុយក្រែន តៃវ៉ាន់ និងព្រំដែនអាមេរិក-ម៉ិកស៊ិក ។

ស្របពេលជាមួយគ្នានេះ ការស្នើសុំជំនួយរបស់អ៊ីស្រាអែលក៏កើតមានឡើង ចំពេលដែលប្រធានាធិបតីសហរដ្ឋអាមេរិកលោក Joe Biden នឹងធ្វើដំណើរទស្សនកិច្ចទៅជួបលោកនាយករដ្ឋមន្ត្រី Benjamin Netanyahu ខណៈតាមការគ្រោងទុកគឺថ្ងៃទី១៨ ខែតុលានេះ ។

គួរបញ្ជាក់ថា ក្រុមហាម៉ាស់បានបើកការវាយប្រហារមិនធ្លាប់មានពីមុនមកទៅលើអ៊ីស្រាអែលកាលពីព្រឹកព្រលឹមថ្ងៃទី៧ ខែតុលា ដោយបានសម្លាប់មនុស្សជាង ១,៤០០ នាក់ ហើយភាគច្រើនជាជនស៊ីវិល ។ ចំណែកនៅតំបន់ហ្គាហ្សាវិញ ការឆ្លើយតបរបស់អ៊ីស្រាអែលបានសម្លាប់មនុស្សជាង ២,៨០០ នាក់ ហើយក្នុងនោះមានក្រុមសកម្មប្រយុទ្ធហាម៉ាស់ប្រហែល ១,៥០០ នាក់ ខណៈមនុស្ស​ជិត ១ ម៉ឺននាក់បាន​រង​របួស ៕

ប្រែសម្រួលដោយ ៖ ជីវ័ន្ត

ប្រភព ៖ The Times of Israel

ចុចអាន ៖ អ៊ីស្រាអែល ថា គ្មានផ្លូវចរចាជាមួយក្រុមហាម៉ាស់ដើម្បីរំដោះចំណាប់ខ្មាំង ឡើយ