ព័ត៌មានអន្ដរជាតិ

ប្រមុខ UN ថ្កោលទោសការវាយប្រហារលើមន្ទីរពេទ្យហ្គាហ្សា រួចអំពាវនាវ២យ៉ាង

បានផុស

១ year មុន

នៅ

ថ្ងៃពុធ ១៨ តុលា ២០២៣

ដោយ

ក្រោយថ្កោលទោសការវាយប្រហារលើមន្ទីរពេទ្យ ហ្គាហ្សា ដែលបានសម្លាប់ជនស៊ីវិលប៉ាឡេស្ទីនរាប់រយនាក់, អគ្គលេខាធិការអង្គការសហប្រជាជាតិ លោក Antonio Guterres បានចេញការអំពាវនាវមនុស្សធម៌ចំនួនពីរ៖ ទី១សុំឲ្យក្រុមហាម៉ាស់ដោះលែងចំណាប់ខ្មាំង ទី២ សុំឲ្យអ៊ីស្រាអែល អនុញ្ញាតឲ្យជំនួយមនុស្សធម៌ បានចូលទៅដល់ជនស៊ីវិលនៅតំបន់ហ្គាហ្សា។

លោក Antonio Guterres (រូបថត៖ Diariodelcauca)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Guterres បានបង្ហោះលើបណ្តាញសង្គមកាលពីថ្ងៃអង្គារទី១៧ខែតុលាថា “ខ្ញុំរន្ធត់ចិត្តជាពន់ពេក ចំពោះការសម្លាប់ជនស៊ីវិលប៉ាឡេស្ទីនរាប់រយនាក់ ក្នុងការវាយប្រហារលើមន្ទីរពេទ្យនៅហ្គាហ្សា ខ្ញុំសូមថ្កោលទោសយ៉ាងខ្លាំង។ បេះដូងរបស់ខ្ញុំគឺនៅជាមួយក្រុមគ្រួសារជនរងគ្រោះ។ មន្ទីរពេទ្យ និងបុគ្គលិកពេទ្យត្រូវបានការពារក្រោមច្បាប់មនុស្សធម៌អន្តរជាតិ”។

មនុស្សជាង៦០០នាក់ត្រូវបានបញ្ជាក់ថាស្លាប់ និង៩០០នាក់ទៀតរងរបួសនៅឯមន្ទីរពេទ្យ Al-Ahli Arab ក្នុងតំបន់ ហ្គាហ្សា កាលពីថ្ងៃអង្គារទី១៧ខែតុលា។

អ៊ីស្រាអែលបានបដិសេធការវាយប្រហារមន្ទីរពេទ្យនេះ តែចោទប្រកាន់ថា នោះគឺជាការបាញ់ខុស ពីក្រុមជីហាតឥស្លាមប៉ាឡេស្ទីន (PIJ) ទៅវិញ។ ទោះបីជាយ៉ាងណាក៏ដោយ PIJ បានចោទប្រកាន់អ៊ីស្រាអែលថា ព្យាយាមបិទបាំងការសម្លាប់រង្គាលនេះ។

ក្រៅពីអ្នកជំងឺ មន្ទីរពេទ្យនេះ ក៏កំពុងផ្តល់ទីជម្រកដល់ជនស៊ីវិលប៉ាឡេស្ទីនជាច្រើននាក់ ដែលកំពុងស្វែងរកការជ្រកកោនពីការវាយឆ្មក់តាមអាកាសរបស់អ៊ីស្រាអែល ផងដែរ។

វេជ្ជបណ្ឌិតជនជាតិប៉ាឡេស្ទីនម្នាក់នៅហ្គាហ្សា បានហៅការវាយប្រហារទៅលើមន្ទីរពេទ្យនេះ ថាជា “ការសម្លាប់រង្គាល” ខណៈតំណាងអឌ្ឍចន្ទក្រហមនៅតំបន់ West Bank ចាត់ទុកវាថាជា “អំពើប្រល័យពូជសាសន៍” និង “ឧក្រិដ្ឋកម្មសង្គ្រាម”៕

ប្រែសម្រួល៖ Vann Vann

ប្រភព៖ Sputnik

ចុចអាន៖ មីស៊ីលធ្លាក់ចំមន្ទីរពេទ្យនៅហ្គាហ្សា ស្លាប់មនុស្សជាង៦០០នាក់ របួសជិត ១០០០នាក់