ក្រៅពី កម្ពុជា, វៀតណាម និងថៃ ក៏កំពុងប្រជែងពង្រីកព្រលានយន្តហោះ​ដូចគ្នា

បណ្តាប្រទេសអាស៊ីអាគ្នេយ៍កំពុងប្រញាប់ប្រញាល់ពង្រីកអាកាសយានដ្ឋានធំៗរបស់ខ្លួនដើម្បីឆ្លើយតបនឹងការកើនឡើងនៃតម្រូវការក្នុងស្រុក ក៏ដូចជាទាក់ទាញការវិនិយោគបរទេស រួមជាមួយអ្នកធ្វើដំណើរ ដើម្បីបង្កើនកំណើនសេដ្ឋកិច្ច បើទោះបីជាផែនការមួយចំនួនកំពុងបង្កើនក្តីបារម្ភអំពីការវិនិយោគលើសកម្រិតក៏ដោយ ។

​យោងតាមការស្រាវជ្រាវរបស់សារព័ត៌មានជប៉ុន Nikkei បានឲ្យដឹងថា ក្រៅពីកម្ពុជា ប្រទេសក្នុងតំបន់អាស៊ានផ្សេងទៀត​ ជាពិសេស​ថៃ និ​ងវៀតណាមក៏កំពុងពង្រីកសមត្ថភាពព្រលានយន្តហោះដូចគ្នា ។ ប្រទេសថៃបានបើកពង្រីកកន្លែងចំណតយន្តហោះនៅអាកាសយានដ្ឋានសុវណ្ណភូមិក្បែរទីក្រុងបាងកកកាលពីខែកញ្ញា ខណៈការពង្រីកកន្លែងចូលចតនេះគឺ ដើម្បីស្តារសេដ្ឋកិច្ចក្នុងស្រុកឲ្យងើបឡើងវិញ និងរួមចំណែកស្តារឧស្សាហកម្មទេសចរណ៍របស់ខ្លួនផងដែរ ។

ស្ថានីយនេះអាចផ្ទុកយន្តហោះបានដល់ទៅ ២៨ គ្រឿង និងអាចផ្ទុកអ្នកដំណើរបាន ១៥ លាននាក់ក្នុងមួយឆ្នាំ ។ នៅពេលដែលដំណើរការពេញលេញ សមត្ថភាពរួមរបស់អាកាសយានដ្ឋាន នឹងកើនឡើងពី ៣០ ភាគរយ ឬ ៦០ លាននាក់ជារៀងរាល់ឆ្នាំ ដើម្បីកាត់បន្ថយការកកស្ទះ ។

ទន្ទឹមនឹងនេះ ផ្លូវរត់យន្តហោះទី ៣ របស់ព្រលានសុវណ្ណភូមិ នឹងបញ្ចប់ការសាងសង់នៅឆ្នាំ ២០២៤ ហើយមានគោលបំណងសាងសង់ស្ថានីយចំណតយន្តហោះទី ២ និងផ្លូវរត់មួយទៀតនៅឆ្នាំ ២០៣០ ដើម្បីបង្កើនសមត្ថភាពដឹកជញ្ជូនអ្នកដំណើរប្រចាំឆ្នាំដល់ ១៥០ លាននាក់ ។

លើសពីនេះ ថៃក៏គ្រោងនឹងពង្រីកអាកាសយានដ្ឋាន ២ ទៀតផងដែរ គឺអាកាសយានដ្ឋានអន្តរជាតិដនមឿងក្បែរទីក្រុងបាងកក និងអាកាសយានដ្ឋានអ៊ូតាប៉ាវ ដែលស្ថិតនៅភាគអាគ្នេយ៍នៃរាជធានី ។ ជារួមមក សមត្ថភាពសរុបនៃអាកាសយានដ្ឋានទាំង ២ នៅក្នុងតំបន់ទីក្រុង នឹងកើនឡើងដល់ ២០០ លាននាក់នៅឆ្នាំ ២០៣០ ។

សម្រាប់ប្រទេសវៀតណាមវិញ នឹងវិនិយោគជាង ៤ ពាន់លានដុល្លារដើម្បីបង្កើនសមត្ថភាពអាកាសយានដ្ឋានអន្តរជាតិ Noi Bai របស់ទីក្រុងហាណូយដល់ ៦០ លាននាក់នៅឆ្នាំ ២០៣០ ដែលស្មើនឹង ២.៥ ដងនៃចំនួនបច្ចុប្បន្នរបស់ខ្លួន ។ ដោយឡែក ក្រៅពី​ថៃ និងវៀតណាម, ប្រទេសម៉ាឡេស៊ី ហ្វីលីពីន​ រួមជាមួយសិង្ហបុរី ​ក៏មានគម្រោង​ពង្រីកអាកាសយានដ្ឋានដូចគ្នាផងដែរ ។

បើតាមក្រុមហ៊ុន Japan Aircraft Development Corporation បានឲ្យដឹងថា តម្រូវការអ្នកដំណើរតាមអាកាសនៅអាស៊ីអាគ្នេយ៍ត្រូវបានគេរំពឹងនឹងកើនឡើងជិត ៣ ដងក្នុងរយៈពេល ២ ទសវត្សរ៍ ចាប់ពីឆ្នាំ ២០១៩ ខណៈអត្រាកំណើនប្រចាំឆ្នាំជាមធ្យមរបស់តំបន់នេះគឺ ៤.៦ ភាគរយ ខ្ពស់ជាងតួលេខសកល ៣.៤ ភាគរយ ៕

ប្រែសម្រួល៖ នាង រតនៈ

ប្រភព៖ Nikkei Asia

ចុចអាន៖ ការលក់អចលនទ្រព្យ ចិន ធ្លាក់ចុះ ២ ខ្ទង់ ខណៈការវិនិយោគកាន់តែពិបាក ងើបឡើងវិញ