បាតុករគាំទ្រប៉ាឡេស្ទីន ចូលលុកលុយ រដ្ឋសភាអាមេរិក, ប៉ូលិសចាប់ខ្លួនមនុស្ស ៣០០នាក់

កាលពីថ្ងៃពុធទី១៨ខែតុលា ក្រុមបាតុករគាំទ្រប៉ាឡេស្ទីនរាប់រយនាក់ បាននាំគ្នាធ្វើបាតុកម្មអង្គុយ ក្នុងរដ្ឋសភាអាមេរិក ដោយទាមទារឲ្យទីក្រុងវ៉ាស៊ីនតោន គាំទ្របទឈប់បាញ់រវាងអ៊ីស្រាអែល និងក្រុមហាម៉ាស់។ ស្របពេលជាមួយគ្នានោះដែរ ប៉ូលិសបានចាប់ខ្លួនបាតុករជាច្រើននាក់ ដែលបដិសេធចេញពីអគារ។

សកម្មជនទាំងនោះ បានបំបែកចេញពីមហាបាតុកម្មធំមួយនៅឧទ្យានន National Mall ហើយចូលទៅអង្គុយនៅលើឥដ្ឋក្នុងអគាររដ្ឋសភា ខណៈក្រុមប៉ូលិសព័ទ្ធជុំវិញ។ ពួកគេនាំគ្នាស្រែកថា “សុំឲ្យមានបទឈប់បាញ់ឥឡូវនេះ! ” ហើយមានកាន់បដាដែលសរសេរថា “អនុញ្ញាតឲ្យហ្គាហ្សា រស់នៅ”។

មិនយូរប៉ុន្មានបន្ទាប់ពីការតវ៉ាចាប់ផ្តើម ប៉ូលិសវិមានកាពីតូល បានព្រមានហ្វូងមនុស្សឲ្យបែកខ្ញែកគ្នា មុនពេលចាប់ខ្លួនអ្នកមិនស្តាប់បញ្ជា។ ប៉ូលិសរាយការណ៍ថា មនុស្សប្រហែល៣០០នាក់ត្រូវបានចាប់ខ្លួន។

បាតុកម្មនេះត្រូវបានរៀបចំឡើងដោយក្រុមសំឡេងជ្វីហ្វដើម្បីសន្តិភាព ដែលអះអាងថាមនុស្សជាង ៣៥០នាក់ បានចូលរួម។ នៅ​ខាង​ក្រៅ ក្រុម​នេះ​បញ្ជាក់​ថា មនុស្ស​រហូត​ដល់​ទៅ ១០០០០ នាក់​បាន​ដើរ​ដង្ហែដើម្បី​ប្រឆាំងនឹងយុទ្ធនា​ការ​បោសសម្អាត​ជនជាតិ​ប៉ាឡេស្ទីន​ដែល​កំពុង​បន្ត​ របស់​រដ្ឋាភិបាល​អ៊ីស្រាអែល។

យុទ្ធនាការ​ផ្លូវអាកាស​របស់​អ៊ីស្រាអែល​ប្រឆាំង​នឹង​ក្រុម​សកម្មប្រយុទ្ធ​ហាម៉ាស់​នៅ​ហ្គាហ្សា​ បាន​ឈាន​ចូល​ដល់​ថ្ងៃ​ទី១២ហើយ គិតត្រឹម​ថ្ងៃ​ពុធ។ ប្រតិបត្តិការនោះ បានចាប់ផ្តើមជាការឆ្លើយតបទៅនឹងការវាយប្រហារទ្រង់ទ្រាយធំលើអ៊ីស្រាអែលដោយក្រុមហាម៉ាស់៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ អ៊ីស្រាអែល បង្ហាញវីដេអូ ដោយអះអាងថា ការវាយប្រហារមន្ទីរពេទ្យហ្គាហ្សា គឺជាស្នាដៃរបស់ក្រុមហាម៉ាស់