ទីបំផុត អេហ្ស៊ីប ព្រមបើកច្រកឲ្យរថយន្តដឹកជំនួយមនុស្សធម៌ ២០ គ្រឿង ចូលទៅតំបន់ហ្គាហ្សា

បើយោងតាមប្រធានាធិបតីសហរដ្ឋអាមេរិកលោក Joe Biden បាននិយាយកាលពីថ្ងៃពុធថា ប្រធានាធិបតីអេហ្ស៊ីបលោក Abdel Fattah al-Sisi បានយល់ព្រមបើកច្រក Rafah ដើម្បីអនុញ្ញាតឲ្យរថយន្តដឹកជំនួយមនុស្សធម៌ចំនួន ២០ គ្រឿងដំបូងឆ្លងកាត់ចូលទៅក្នុងតំបន់ហ្គាហ្សា ។

លោក Biden បានប្រាប់អ្នកយកព័ត៌មាន បន្ទាប់ពីតេទូរសព្ទទៅលោក Sisi ពេលកំពុងជិះយន្តហោះ Air Force One ថា “ប្រធានាធិបតីអេហ្ស៊ីបបានអនុញ្ញាតឲ្យរថយន្តដឹកជំនួយមនុស្សធម៌រហូតដល់ ២០ គ្រឿងឆ្លងកាត់ចូលដើម្បីចាប់ផ្តើមចែកចាយជំនួយដល់តំបន់ហ្គាហ្សាហើយ” ។

ប្រធានាធិបតីរូបនេះបាននិយាយទៀតថា ផែនការដឹកជញ្ជូននេះយូរបំផុតគឺត្រឹមថ្ងៃសុក្រ ប៉ុន្តែត្រូវចំណាយពេល ៨ ម៉ោង ដោយសារតែផ្លូវឆ្លងកាត់មួយចំនួនត្រូវការពេលជួសជុល ហើយឡានចំនួន ២០ គ្រឿងដំបូងនេះក៏ជាការសាកល្បងនៃប្រព័ន្ធចែកចាយជំនួយទៅកាន់តំបន់ហ្គាហ្សាផងដែរ ជាពិសេសថាតើក្រុមហាម៉ាស់មានប្រតិកម្មយ៉ាងណាចំពោះផែនការនេះ ។

លោក Biden ​បាន​បន្ថែម​ថា រថយន្ត​ដឹក​ទំនិញ​ទាំង ២០ គ្រឿង​តំណាង​ឲ្យ​រថយន្ត​ដឹកជំនួយដំបូង ប៉ុន្តែ​យើងមានរថយន្ត​ដឹក​ជំនួយនេះសរុប​ចំនួន ១៥០ គ្រឿងឯណោះដែល​កំពុង​រង់ចាំដឹកជាបន្តបន្ទាប់ ប៉ុន្តែវាក៏អាស្រ័យលើពេលវេលា ក៏ដូចជាមធ្យោបាយផ្សេងៗផងដែរ ។

គួរបញ្ជាក់ថា ដើមឡើយលោក Biden គ្រោងនឹងជួបលោក Sisi នៅថ្ងៃពុធ ទី១៨ ខែតុលានេះនៅឯកិច្ចប្រជុំកំពូលផ្លូវបួនក្នុងប្រទេសហ្ស៊កដានី ប៉ុន្តែត្រូវបានលុបចោលភ្លាមៗ បន្ទាប់ពីការវាយប្រហារដ៏សាហាវទៅលើមន្ទីរពេទ្យក្នុងតំបន់ហ្គាហ្សាសម្លាប់មនុស្សប្រមាណ ៥០០ នាក់ដែលបណ្តាលឲ្យមានកំហឹងពាសពេញពិភពអារ៉ាប់ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ តុលាការឧក្រិដ្ឋកម្មអន្តរជាតិ ICC នៅស្ងៀមរឿង អ៊ីស្រាអែល វាយប្រហារសម្លាប់ជនស៊ីវិលនៅហ្គាហ្សា