សកម្មជនអាកាសធាតុវ័យក្មេង Greta Thunberg រងការចោទប្រកាន់ពីបទ​ល្មើសសណ្ដាប់ធ្នាប់សាធារណៈ

សកម្មជនអាកាសធាតុវ័យក្មេងនាង Greta Thunberg ត្រូវបានចោទប្រកាន់ពីបទល្មើសសណ្តាប់ធ្នាប់សាធារណៈ បន្ទាប់ពីត្រូវបានចាប់ខ្លួននៅក្នុងបាតុកម្មប្រឆាំងនឹងសន្និសីទឧស្សាហកម្មប្រេង និងឧស្ម័ននៅកណ្ដាលទីក្រុងឡុងដ៍កាលពីថ្ងៃអង្គារ ។

កងកម្លាំងប៉ូលិសទីក្រុងឡុងដ៍បាននិយាយកាលពីថ្ងៃពុធថា សកម្មជនស៊ុយអែតវ័យ ២០ ឆ្នាំរូបនេះ គឺជាមនុស្សម្នាក់ក្នុងចំណោមមនុស្ស ២៦ នាក់ដែលត្រូវបានចោទប្រកាន់ បន្ទាប់ពីក្រុមអ្នកតវ៉ាបានប្រមូលផ្តុំគ្នានៅខាងក្រៅសណ្ឋាគារ InterContinental ក្នុងអំឡុងវេទិកាថាមពល ។

ប៉ូលិសបាននិយាយថា នាង Thunberg ត្រូវបានឃាត់ខ្លួន និងនាំទៅកាន់ប៉ុស្តិ៍ប៉ូលិស មុនពេលត្រូវបានដោះលែងវិញពេញមួយយប់ ។ នាងត្រូវបានចោទប្រកាន់ពីបទរំលោភលើផ្នែកមួយនៃច្បាប់សណ្តាប់ធ្នាប់សាធារណៈ ដែលតម្រូវឲ្យប៉ូលិសដាក់កម្លាំងការពារលើការប្រមូលផ្ដុំសាធារណៈបែបនេះ ។

ទោះយ៉ាងណា ក្រោយមកសកម្មជនវ័យក្មេងរូបនេះ រួមជាមួយអ្នកតវ៉ាផ្សេងទៀតត្រូវបានដោះលែងឲ្យនៅក្រៅឃុំជាបណ្ដោះអាសន្ន រហូតដល់ការប្រកាសសវនាការនៅឯតុលាការ Westminster Magistrates របស់ទីក្រុងឡុងដ៍នៅថ្ងៃទី១៥ ខែវិច្ឆិកា ។

គួរបញ្ជាក់ថា សន្និសីទរយៈពេល ៣ ថ្ងៃ ដែលបញ្ចប់នៅថ្ងៃព្រហស្បតិ៍នេះ មានអ្នកចូលរួមទាំង នាយកប្រតិបត្តិរបស់ក្រុមហ៊ុន Shell ក្រុមហ៊ុន Aramco របស់អារ៉ាប៊ីសាអូឌីត និងក្រុមហ៊ុន Equinor របស់ន័រវេស ក៏ដូចជារដ្ឋមន្ត្រីសន្តិសុខថាមពលរបស់ចក្រភពអង់គ្លេសផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ The Independent