អ៊ីស្រាអែល សម្លាប់មេកងកម្លាំងសន្តិសុខក្រុមហាម៉ាស់ និងគ្រួសារ

កាលពីថ្ងៃព្រហស្បតិ៍ទី១៩ខែតុលា ប្រមុខកងកម្លាំងសន្តិសុខរបស់ក្រុមហាម៉ាស់លោក Jehad Mheisen ត្រូវបានសម្លាប់ រួមជាមួយនឹងសមាជិកគ្រួសារ ក្នុងការវាយប្រហារតាមអាកាសរបស់អ៊ីស្រាអែលទៅលើផ្ទះរបស់ពួកគេ ខណៈអ៊ីស្រាអែលបន្តការទម្លាក់គ្រាប់បែក ទៅលើតំបន់ហ្គាហ្សាស្ទ្រីប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ៊ីស្រាអែលនិយាយថា ខ្លួនកំពុងវាយលុកក្រុមហាម៉ាស់ គ្រប់ទីកន្លែងក្នុងតំបន់ ហ្គាហ្សា ហើយចោទប្រកាន់មេដឹកនាំ និងអ្នកប្រយុទ្ធរបស់ក្រុមនេះថា បានជ្រកកោនក្នុងចំណោមប្រជាជនស៊ីវិល ប៉ុន្តែការវាយប្រហារតាមផ្លូវអាកាសរបស់អ៊ីស្រាអែល បានបន្តបំផ្លាញសង្កាត់ទាំងមូលនៅទូទាំងទឹកដីដែលមានប្រជាជនរស់នៅយ៉ាងច្រើនក្រាស់ក្រែល ដោយបន្សល់ទុកការស្លាប់ និងការបំផ្លិចបំផ្លាញជាបន្តបន្ទាប់។

កាលពីថ្ងៃព្រហស្បតិ៍ ការទម្លាក់គ្រាប់បែក បានវាយលុកទីតាំងនានានៅទូទាំងតំបន់ហ្គាហ្សាស្ទ្រីប រួមទាំងផ្នែកខ្លះនៃភាគខាងត្បូង ដែលអ៊ីស្រាអែលប្រកាសថាជា “តំបន់សុវត្ថិភាព” ផងដែរ។

ប្រជាជនប៉ាឡេស្ទីន បានដើរស្វែងរកមនុស្សជាទីស្រឡាញ់នៅតាមគំនរបាក់បែក ទូទាំងតំបន់ហ្គាហ្សា ហើយពួកគេបានស្រែកដោយក្តីសោកសង្រេង ពេលរកឃើញសាកសពកូនៗ ប្រពន្ធ និងឪពុកម្តាយ។

ក្នុងរយៈពេលជិតពីរសប្តាហ៍ចាប់តាំងពីអ៊ីស្រាអែលចាប់ផ្តើមការទម្លាក់គ្រាប់បែក ដើម្បីឆ្លើយតបទៅនឹងការវាយប្រហាររបស់ក្រុមហាម៉ាស់ដែលបានសម្លាប់មនុស្ស១៣០០នាក់, ផ្ទះរាប់ពាន់ខ្នងត្រូវបានបំផ្លាញនៅទូទាំងតំបន់ហ្គាហ្សា ហើយប្រជាជនប៉ាឡេស្ទីន៣៧៨៥នាក់នាក់ត្រូវបានសម្លាប់ រួមទាំងកុមារ១៥២៤នាក់ផងដែរ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ លេចចេញក្រុមមួយទៀត បាញ់មីស៊ីលនិងដ្រូនពីប្រទេសយេម៉ែន សំដៅទៅអ៊ីស្រាអែល តែត្រូវអាមេរិក ស្ទាក់ចាប់ទាន់