តុលាការនៅរដ្ឋមួយរបស់ អាមេរិក ចោទប្រកាន់បុគ្គល ៤ រូប ពីបទលក់ឆ្អឹងដាយណូស័រ

កាលពីថ្ងៃព្រហស្បតិ៍ ទី១៩ ខែតុលា គណៈកម្មការវិនិច្ឆ័យរបស់តុលាការសហព័ន្ធនៅទីក្រុង Salt Lake រដ្ឋ Utah សហរដ្ឋអាមេរិក បានចោទប្រកាន់មនុស្ស ៤ នាក់ថា បានទិញ និងលក់ “ធនធានបុរាណវិទ្យា” រួមមានឆ្អឹងដាយណូស័រ ពីអាមេរិកទៅប្រទេសចិនក្នុងតម្លៃជាង ១ លានដុល្លារ ។

អ្នកទាំង ៤ មានឈ្មោះថា Vint Wade អាយុ ៦៥ ឆ្នាំ, Donna Wade អាយុ ៦៧ ឆ្នាំ, Steven Willing អាយុ ៦៧ ឆ្នាំ និង Jordan Willing អាយុ ៤០ ឆ្នាំ ។ ពួកគេរកស៊ីជួញដូរឆ្អឹងដាយណូស័រជាង ៥ ឆ្នាំមកហើយ ដូច្នេះត្រូវរងការចោទប្រកាន់ពីសំណាក់តុលាការសហរដ្ឋអាមេរិកថាបានលាក់​បាំង និង​រក្សា​ទ្រព្យ​សម្បត្តិ​ចោរ​ ។

លោក Wades បានស្តុកទុកធនធានបុរាណវិទ្យា ដើម្បីលក់ ហើយក៏លក់ឲ្យ Steven និង Jordan Willing ផងដែរ ។ Steven និង Jordan បាននាំចេញឆ្អឹងដាយណូស័រទៅកាន់ប្រទេសចិនតាមរយៈក្រុមហ៊ុនរបស់ពួកគេ JMW Sales Inc ដោយដាក់ស្លាកខុស ដែលធ្វើឲ្យតម្លៃរបស់វាធ្លាក់ចុះ ។

ពាក់ព័ន្ធនឹងករណីខាងលើ Rachel Cannon មេធាវីតំណាងឱ្យ Jordan Willing បាននិយាយថាកូនក្តីរបស់នាង “ជំទាស់នឹងការចោទប្រកាន់នេះហើយទន្ទឹងរង់ចាំថ្ងៃឡើងតុលាការ” ហើយគាត់មិនត្រូវបានឃុំខ្លួនទេ ។

ចំណែកឯមេធាវី​ម្នាក់ទៀត​របស់​លោក Vint Wade បាន​បដិសេធ​មិន​ធ្វើ​អត្ថាធិប្បាយអ្វីនោះទេ ខណៈអ្នកផ្សេងទៀតមិនអាចទាក់ទងបានឡើយ ៕

ប្រែសម្រួល៖ វារី

ប្រភព៖ NBC

ចុចអាន៖ ប្រទះឃើញស្នាមជើងដាយណូស័រចំនួន ៧០ ដោយចៃដន្យនៅរដ្ឋតិចសាស់