អ៊ីស្រាអែល បន្តការវាយឆ្មក់តាមអាកាសសម្លាប់មនុស្ស ៤៦ នាក់ទៀតនៅ ហ្គាហ្សា

យ៉ាងហោចណាស់មនុស្ស ៤៦ នាក់ត្រូវបានសម្លាប់នៅក្នុងការវាយឆ្មក់តាមផ្លូវអាកាសពេញមួយយប់ពីសំណាក់យោធារបស់អ៊ីស្រាអែលទៅលើតំបន់ហ្គាហ្សា ខណៈក្នុងចំណោមអ្នកស្លាប់ទាំងនោះនាក់ រួមមាន ២៤ នាក់ជាសមាជិកក្រុមគ្រួសារ al-Motawwaq រស់នៅនៅទីក្រុង Jabalia ។

ចំណែក ១០ នាក់ទៀតគឺជាសមាជិកក្រុមគ្រួសារ al-Ajrami រស់នៅទីក្រុង Jabalia ដូចគ្នា ខណៈមនុស្ស ៥ នាក់មកពីគ្រួសារ Khader ហើយក្នុងនោះមានកុមារ ៤ នាក់ និងស្ត្រីម្នាក់ផងដែរ ។

ស្របពេលជាមួយគ្នានេះ មនុស្ស ៧ នាក់ផ្សេងទៀតដែលត្រូវបានសម្លាប់នៅក្នុងការវាយឆ្មក់តាមអាកាសរបស់អ៊ីស្រាអែល គឺជាអ្នករស់នៅកណ្តាលទីក្រុង Deir el-Balah និងជំរុំជនភៀសខ្លួន al-Bureij កណ្តាលតំបន់ហ្គាហ្សា ។

គួរបញ្ជាក់ថា ភាពតានតឹងថ្មីដែលបានផ្ទុះឡើងនៅមជ្ឈិមបូព៌ាបានអូសបន្លាយពេលដល់ថ្ងៃទី១៤ ហើយ បន្ទាប់ពីក្រុមហាម៉ាស់បានបើកការវាយប្រហារមកលើទឹកដីអ៊ីស្រាអែលចេញពីតំបន់ហ្គាហ្សាស្ទ្រីបកាលពីព្រឹកព្រលឹមថ្ងៃទី៧ ខែតុលា ដោយបានសម្លាប់មនុស្សជាង ១,៤០០ នាក់ ដែលភាគច្រើនជាជនស៊ីវិល ។

ចំណែកនៅតំបន់ហ្គាហ្សាវិញ ក្រសួងសុខាភិបាលដែលគ្រប់គ្រងដោយក្រុមហាម៉ាស់បាននិយាយថា ការឆ្លើយតបរបស់អ៊ីស្រាអែលបានសម្លាប់មនុស្សជិត ៤,០០០ នាក់ ហើយក្នុងនោះមានក្រុមសកម្មប្រយុទ្ធហាម៉ាស់ជាង ១,៥០០ នាក់នៅក្នុងទឹកដីអ៊ីស្រាអែល ខណៈមនុស្ស​ប្រមាណ ១២,០០០ នាក់បាន​រង​របួស ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ មេបក្សប្រឆាំង អ៊ីស្រាអែល ប្រាប់ពីជម្រើសដ៏ល្អបំផុតក្នុងការបញ្ចប់ជម្លោះ​ជាមួយក្រុមហាម៉ាស់