តំណែងប្រធានសភា កំពុងធ្វើឲ្យ អាមេរិក ក្រពុលមុខរឿងផ្ដល់លុយដល់ អ៊ីស្រាអែល និងអ៊ុយក្រែន

រហូតមកដល់ពេលនេះ សហរដ្ឋអាមេរិកមិនទាន់ជ្រើសបានប្រធានរដ្ឋសភាថ្មីនៅឡើយទេ បន្ទាប់ពីបេក្ខជនមកពីគណបក្សសាធារណរដ្ឋគឺលោក Jim Jordan នៅតែបរាជ័យក្នុងការទទួលបានសំឡេងគាំទ្រគ្រប់គ្រាន់ពីសមាជិកបក្សរបស់គាត់ ។

គណបក្សសាធារណរដ្ឋបានតែងតាំងលោក Jim Jordan ដែលជាមនុស្សជំនិតរបស់អតីតប្រធានាធិបតី Donald Trump សម្រាប់មុខតំណែងមួយនេះ បន្ទាប់ពីការបណ្តេញលោក Kevin McCarthy ចេញពីតំណែងប្រធានរដ្ឋសភាមិនធ្លាប់ក្នុងប្រវត្តិសាស្ត្រអាមេរិកកាលពីថ្ងៃទី៣ ខែតុលា ។

ពាក់ព័ន្ធនឹងតំណែងប្រធានរដ្ឋសភានៅទំនេរនេះ រដ្ឋបាលរបស់ប្រធានាធិបតីអាមេរិក Joe Biden ក៏កំពុងក្រពុលមុខខ្លាំងផងដែរ ជាពិសេសគឺការជាប់គាំងសម្រាប់សំណើសុំជំនួយថវិកាបន្ទាន់បន្ថែមសម្រាប់ផ្ដល់ទៅឲ្យអ៊ីស្រាអែល និងអ៊ុយក្រែន ដែលប្រទេសទាំងពីរសុទ្ធសឹងតែកំពុងជាប់ដៃធ្វើសង្គ្រាម ។

កាលពីថ្ងៃសុក្រសេតវិមានបានដាក់សំណើទៅកាន់សភាអាមេរិកដើម្បីស្នើសុំថវិកាចំនួន ១០៦ ពាន់លានដុល្លារសម្រាប់ជួយទៅដល់រដ្ឋាភិបាលអ៊ុយក្រែន និងអ៊ីស្រាអែលដើម្បីកម្ចាត់ក្រុមហប្រដា់ប់អាវុធហាម៉ាស់ ប៉ុន្តែសំណើនេះនៅតែជាក្រដាសមិនទាន់មានតម្លៃនៅឡើយ ដោយសារតែមិនទាន់មានប្រធានសភាដើម្បីអនុម័តសំណើរទាំងនោះឡើយ ។

គួរបញ្ជាក់ថា នេះគឺជាលើកទី ៣ ហើយសម្រាប់លោក Jordan ដែលរងបរាជ័យក្នុងការកាន់កាប់តំណែងជាប្រធានរដ្ឋសភាថ្មី បន្ទាប់ពីសមាជិកសភាមកពីគណបក្សសាធារណរដ្ឋជាង ២០ រូបបានបោះឆ្នោតប្រឆាំងនឹងរូបលោក ដោយសារមនុស្សជំនិតរបស់លោក Trump រូបនេះជាអ្នកប្រឆាំងផ្កាប់មុខសម្រាប់ការផ្ដល់ជំនួយបន្ថែមទៅឲ្យអ៊ុយក្រែន ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ មេបក្សប្រឆាំង អ៊ីស្រាអែល ប្រាប់ពីជម្រើសដ៏ល្អបំផុតក្នុងការបញ្ចប់ជម្លោះ​ជាមួយក្រុមហាម៉ាស់